O le Aso Toonai na potopoto ai se ulugalii mai i Ausetalia ma le la tama teine e igoa ia Lauren. Sa tumutumu i le faletalimalo o Safua i Lalomalava i Savaii.
O le auga o le faatasiga, o le faamanatu ai o le atoaga o le 60 o tausaga o le tamā o le aiga e suafa ia Geoff Hoddinot ma na o ia lava ma lona faletua o Barbara ma le la tama teine e toatasi na malaga mai i Samoa e faamanatu ai le Aso Fanau.
O le mafuaaga o le malaga mai na o i laua e aunoa ma ni aiga ma ni uo mai i Ausetalia ona o le manatu e lē manaomia nisi i Ausetalia e faamanatu lenei aso tāua ona o le toatele o a la uo ma i latou ua faaaiga i ai e nonofo uma lava i Samoa.
O le ulugalii lenei, o le uluai faipisinisi lea na faatautaia ni faigamalaga mo tagata tafafao mai i Samoa sa feoai ai i se vaafaila i gataifale o Samoa.
O le tele o ia tafaoga i le vaafaila na o la faatautaia, sa agai lava i le atu Aleipata aemaise tafaoga faapitoa na faia i le atu Anoamaa aemaise o Falefa ma le agai atu ai i Fagaloa.
O le vaitau o le 1980 i le tau faaiuiuga ma agai atu i le 1990 na faatautaia ai lea atina‘e, ae o le isi 10 tausaga muamua atu na faato‘ā agai mai ai le ulugalii lenei i Samoa.
O Geoff Hoddinot na malaga mai i Samoa ma galue ai i le 1980. O ia galuega na tele ai ina agai i le motu tele i Salafai.
O le tausaga e 1981 na fetaui ai i le tamaitai o le a faaipoipo ma nofo ai.
O Barbara sa i Samoa mo tafaoga ma na fetaui i le faletalimalo o le Safua Hotel i Lalomalava ma o inā lea ua toe foi i ai e faamanatu le aso soifua o le tamā o le aiga. O le fetauiga lea na amata ai loa le mafutaga a o lei toe foi mo sina taimi i Ausetalia.
O le tausaga e 1987 na toe foi mai ai i Samoa ma faaipoipo loa ma o le la filifiliga foi na faatautaia ai lo la aso tāua i le Malumalu o le Ekalesia Faapotopotoga Kerisiano Samoa i Sapapalii, le uluai afioaga na talia le Talalelei i Samoa.
Sa faaauau ai loa ona nonofo i laua i Samoa ma ua manatu ai loa e faatu se atina‘e a o nonofo ai i le atunuu.
O le vaafaila sa iai a lea ulugalii na amata ai loa ma le atina‘e lea na ta‘ua o le Samoan Snark.
E lē gata la i faigamalaga taamilo i gataifale o Upolu ae sa nonofo le ulugalii lenei i le faletalimalo o Aggie Grey’s i Vaisigano i ia vaitaimi ma o la faatautaia ai ni tafaoga mo tagata sa mafai ona asiasi mai i Samoa i le vaitau lea o le 1980-1990.
Faaalia e le tamā ia Geoff Hoddinot – o ia aso e tau leai ni tagata asiasi mai i Samoa ma o tafaoga la sa o la faatautaia na mafai ai ona fesootai ma Alii ma Faipule o afioaga eseese ma talosagaina le talia atu o papalagi, e asiasi i afioaga nei ma maua se avanoa e vaavaai ai i le olaga o tagata Samoa i tua i nuu, maua ai le avanoa e talanoa ma vaavaai i le faatinoga o faigafaiva, o galuega i le maumaga, o tiute ma faiva alofilima o tina o falelalaga, aemaise ai le gasesega o taumafa a tagata Samoa.
O se atina‘e na amata ai lava ona unai tu ma aganuu a Samoa i tagata mai i fafo.
O vaitaimi ia na ta‘ua foi e Geoff e na o le tasi lava le taavale laupasese sa fealuai i Savaii, tau leai ni taavale i Upolu foi latou ma o se taulaga laitiiti – e lei mamā e pei ona vaaia nei ma e tau leai lava ni tagata e asiasi mai.
O le atina‘e aupito sili lenei ona saoasaoa i lenei vaitau ma na ta‘ua e lenei ulugalii le maofa i suiga ua iai nei.
O le soo o le eletise i le tele o nofoaga o le atunuu, o le maua o le suavai – o le vaaiga i moli auala o fale tetele aemaise o le tele o faigamalaga ua aumai ai tagata tafafao i Samoa – ua na ona pau nei o ni vaaiga ua o la faaalia ai le mautinoa o le laalaa i luma o Samoa ma lona atina‘e.
O le atina‘e a lenei ulugalii na o la ta‘ua na faigata lava ona umi se taimi e faatino ai i ia vaitau o le tusa ma le 20 tausaga talu ai ona o le itu lea e leai nisi na mafai ona tautuaina faaauau ma na iu lava ia toe foi le ulugalii i Ausetalia.
O le vaa na faaaogā mo faigamalaga i Upolu, na goto ina ua oo atu folauga a le alii o Geoff ma se isi ana uo i Niu Kaletonia – mafua mai i matagi malolosi na feto‘ai lelei ma le vaafaila.
Sa muamua Barbara i le vaalele ma mafai ai loa ona logo laveai mai i Papua Niu Kini ona laveaia ai lea o Geoff ma lana uo ae ua goto lava le vaafaila na fai ai le pisinisi o le Samoan Snark.
O uo uma la a le ulugalii lenei i Samoa, sa valaaulia uma e le ulugalii mo le faamanatu ai o le Aso Fanau o Geoff, ina ia toe manatua le tele o galuega na taumafai mai ai i le sili atu i le 20 tausaga talu ai, aemaise o le toe faamanatu ai o le tāua o le fesootaiga a lenei aiga ma Samoa lea ua toe taliu mai lava e faamanatu ai lenei aso tāua o le soifua o lenei tamā aemaise lona aiga ua iai nei.
