O le au tietie pasika, o se tamaitai Initia e le taofiofia le sau o le suavai i le fofoga sei tulou, o le saa e igoa ia Toetu ma i latou e tafitifiti i luga o le ea, o nisi ia o vaega o le faaaliga tele ua amata nei i se nofoaga i tai atu o le faletalimalo o le Tusitala i Sogi lea ua faamautu ai Tupa’i Bruno ma lana vaega faafiafia.
O le igoa o le Faaaliga o le Magic Circus of Samoa lea ua silia i le 15 tausaga o faatuina e le alii lenei mai Amerika ua taua lava Samoa o lona atunuu ma ua malaga taamilo foi i le Pasefika ma isi itu o le lalolagi e faalauiloa ai faaaliga ma faafiafiaga nei aua maimoaga a le faitau afe o tagata. Ua leva ona toe foi mai i le amataga o le tausaga Tupai Bruno ma lana aufaafiafia lea e toatele lava o alo o Samoa ae ua faaopoopo i ai nisi mai Saina, Initia faapea isi itu o le lalolagi aua lava le saunia o faafiafiaga ofoofogia mo i latou i Samoa nei.
Faaalia e lenei alii e le o mautinoa lelei se umi e nonofo ai i Samoa nei ae ona pau le tulaga mautinoa o le a umi se taimi e faamautu ai i le atunuu ona saili foi lea o isi atunuu o le Pasefika e agai i ai lenei faaaliga tele.
O a lava ana faaaliga tetele ua maea faatautaia e amata faaalia lava i Samoa a o lei agai atu i isi atunuu i fafo ma ua vaaia foi le tumutumu o fanau ma tagata matutua i lea nofoaga mo le maimoaina o nei faaaliga aemaise o taaloga eseese ua faamautu ai i lea fanua i Sogi.
E le o iai ni meaola i le faaaliga lenei ona ua silia i le lima tausaga talu ona taofia e le Magic Circus of Samoa le toe aofia ai o meaola i nei faaaliga. O loo tele foi faafiafiaga faa-Samoa o loo faatautaia i lenei faaaliga ma na faaalia e Tupa’i Bruno e le gata o se faaaliga lenei e unaia ai taleni a alo o Samoa ua ofi mai i lea foi galuega, ae o se faaaliga ua saga faalautele atu ai le igoa o Samoa i atunuu i fafo.
