Toe foi le tama Savaii

Ua toe nei o nai vaiaso ona faalauiloa loa lea ma faatau atu i tua le DVD o le ata tifaga ua faaigoaina o le “Toe foi le tama Savaii”.
O lenei ata tifaga o se tasi o ata sa tuufaatasia lea e le susuga Vili Leilua Ieru faatasi ai ma le lagolagosua a le tofa Tupai Faasalafa. I se feiloaiga ma le susuga Vili Leilua Ieru na ia ta‘ua ai, e lē fou ia te ia lenei vaaiga.
O se vaaiga ua leva ona ia tilotilo i ai a o laitiiti ma tuputupu a‘e i totonu o le latou foi aiga ma le afioaga. O le vaaiga lea i le faiga o nai faiavā ma e lagona lava le faanoanoa ona e oo mai lava i nisi o aiga i nei onapo o loo tumau pea le faiga lea e pei e tusiesea ai nai tamaloloa e mau  paolo mai i totonu o aiga.
O le saunoaga a le susuga Vili, o se tasi lenei o vaega o le soifuaga ua leva ona vaavaai pea i ai aemaise o le faatusaina lea o le tu faasamoa ma le oo mai o le talalelei lea e tutusa ai tagata uma i le silafaga a lo tatou Atua.
O le ala lea na ia tusia ai se tasi o pese lea foi sa lauiloa i nisi o tausaga ua tuanai atu e faaigoaina lava o le “Toe foi le tama Savaii”.
A o lea pese sa taoto ai ma le faamoemoe e iai se aso o le a faapea ona tusia faapitoa ai se tala ma avea loa ma ata tifaga e pei ona iai nei.
O le tofa ia Tupai Faasalafa o ia lea o loo lagolagosua i le susuga ia Vili auā lenei ata tifaga ma o se ata tifaga o le a faamalieina ai le silasila a le mamalu o si o tatou atunuu pe a oo ina agai mai i tua ma faatau atu i tagata lautele.
O le vaiaso muamua o Oketopa lea ua faasauni le susuga Vili e faalauiloa ai lenei ata mo maimoaga a le atunuu, ma e lē gata i Samoa ae faapea foi Niu Sila ma Ausetalia ma isi atunuu o le lalolagi o loo aumau ai nai o tatou tagata, o le a faapea ona silasila uma i lenei taumafaiga.
O le ata “Toe foi le tama Savaii” sa pueina lea i laufanua o Samoa ma o loo faapea ona faalauiloa atu ai ma le matagofie o le tele o nisi o vaaiga i totonu o si o tatou atunuu e pei o nuu ma afioaga, o le uafu ma luga o vaa atoa ai ma le tele o vaaiga matagofie o le a molimauina i lenei ata tifaga.