E lei aumaia se faamatalaga aloaia mai le taitaifono ma le komiti faafoe o le Iuni lakapi a le atunuu, ae ua salalau ai nei faamatalaga i luga o upega tafa‘ilagi ma fesootaiga televavave ua faaalia ai le toe filifilia o se tasi o tamalii o le atunuu lauiloa i le lakapi, le afioga Fuimaono Titimaea Tafua poo Dicky e pei ona lau silafia ai e avea ma faiaogaulu o le aulakapi taitoafitu a le atunuu.
Ua faaalia foi le filifilia o le afioga Galumalemana Rudolf Moors sa avea foi ma faiaoga o le ‘au taitoafitu i ni tausaga e lei mamao atu, e avea ma taitai malaga o le ‘au taitoafitu, ma o le itu mautinoa o ia foi lea o le faiaoga lagolago.
Ua faaalia e se molimau ua faamaonia lea filifiliga ae o le a faatoa faalauiloa aloaia mai se faamatalaga aloaia mai le Iuni i se aso e lē o toe mamao.
Sa avea muamua Fuimaono ma faiaogaulu o le ‘au taitoafitu ma le ‘au tele a le Manu Samoa peitai na faamavae ina ua filifilia e avea ma failautusi a le afioga i le Ao Mamalu o le Malo, o se tofiga na ia toe tuua ona o nisi ona tiute i le atinaeina o le lakapi i le atunuu.
O lea la ua toe tofia, ma o se fiafiaga lea i le toatele o le atunuu sa alalaga ma faailoa lagona ua tatau ona toe see ane Fuimaono Titimaea e toe tauave le tulaga faiaogaulu ina ua aliali le tele o faaletonu i taumafaiga a le aulakapi taitoafitu.
O le faamavae o le faiaogaulu sa iai talu ai nei le susuga Viliamu Punivalu na faasalalau ai le avanoa lea ua toe pale mai ai lea tamalii o le atunuu.
