E pei ua toe oo Samoa i vaitau e lei iai se eletise i le tulaga ua iai nei le pe atoa o le tele o le taulaga ma nuu tulalata ai. Ua motusia uma fesootaiga tau i televise ma na o aiga lava o loo iai maa moliuila o loo ola a latou leitio.
Faafetai i mea nei o telefoni feaveai ua maua ai ni fesootaiga ma atunuu mamao i le malosi o a latou auaunaga.
Na maua ai foi nai meaalofa ua fafaga fua le ta‘i $5 i le po o le Aso Tofi mo tagata fai telefoni feaveai.
Ua fafaga fua foi telefoni a le mamalu o le atunuu e lei maua lava ni eletise ma ua matuā tumutumu lava fale telefoni latou i le taumafai o le toatele e fafaga telefoni feaveai.
Ua na o le pau lea o fesootaiga o loo maua e le toatele ae o telefoni fale ua tele ina faaleagaina i le susū o fale ma ofisa. O televise ma leitio i nofoaga o loo ola ai, o loo maua lava le taimi e maua ai fesootaiga ae pe mai i isi taimi.
O togafai ua pei o ni malaevaalele i le faaleagaina uma ma le tele o ulu ua amata ona fua le fuata ma ua taumamafa foi nisi i o latou ‘ulu ua matuā suati uma i luga e le afā.
O se oge tele foi la lea o le a vaavaai atu i ai Samoa i le isi savaliga i le faaiuga o le tausaga ma le amataga o le tausaga fou.
E laititi lava nai faleoloa ia ua matala mo manaoga vave o le atunuu ma e laki lava faleoloa o loo iai afi ia ua maua ai se aano o manufasi ae o meaai tuuapa lava lea ua tele ina faamoemoe i ai le atunuu.
O le pogisa atoa o po e matuā tele foi le aafiaga aemaise i augatupulaga laiti o lea faatoa molimauina ni afā i Samoa. O le toatele lava o fanau e matuā lē malamalama i le umi ona leai o se vai ae o se eletise foi ma e fiu e tau faamalamalama o le tulaga lava lea e iai Samoa i taimi louloua faapenei e matuā lē malamalama lava.
O le itu tāua e lē o toatele fanau laiti o aafia. O le taimi lenei i le palapala to‘a o loo matuā tele le galuega e fia faia i ai. E oo lava i le malae taalo o le Apia Park e pei o iina na agai atu i ai isi alavai ma to‘a ai ma na logo mai e nisi aiga i le Aso Tofi le manaomia o ni paopao e agai ese ai ona o le loloto o le vai ma le to‘a sa iai ona ua agai uma atu i ai le tele o vai ia na pāpā mai i uta o le ogatotonu lea o le Vaimauga.
O le tele lava foi o faaeteetega i le taimi lenei ona o lea ua logo mai e le Pulega o le Suavai e vili atu tagata mo loli vai e maua ai se suavai taumafa ae e leai ma se vaitafe manino e oo i le itu lea i Faleata ua matuā leai lava se vai o toe vaaia se manino ae o loo fai ai lava tagamea a le toatele i le taumafai e faamamā fale ua matuā susū ma faaleagaina ai lavalava o le atunuu.
O le matagaluega o leoleo e lē o malolo i le tau sailiga o tagata maliliu ma o nai aiga na feeseeseai i le po o le Aso Tofi o le Aso Toonai lea na faatoa toe feiloai ai nisi ma faapea ai loa ona faamautu le numera o tagata ua leiloloa ma o le toatele lava la e mai i afioaga ia o Magiagi, Lelata, Maagao, Faatoia ma le itu la lea o Falealili i Malaemalu.
O le tele lava o nofoaga na saofia mai o latou fale ua faapea ona tau faamamā laau palalasi ma o le a sauni atu Samoa i se oge tele i le lumanai ona o le tele o laau nei e maua ai taumafa ua faaleagaina.
O loo talotalo le toatele ia maua pea le karasini, moliga‘o ma maa moliuila i lenei taimi a o feagai ai ma le leai o se eletise.
