O se fiafiaga i le afioga ia Tuilaepa Elise o Magele i Aukilani i Saute, le faaauau pea ona totō fualaau aina, fualaau taumafa mata, e oo lava i le fa‘i, e fesoasoani tele i taumafa ma le tausiga o le aiga i lenei vaitaimi a o feagai ai ma le taugata o le soifuaga ma le leaga o le tamaoaiga ua iai nei.
O se toe fafagu tāua foi lea mo le toatele o le mamalu o Samoa i Samoa ma Niu Sila, pe afai o lava ma avanoa se lauelele i tuamaota ma tualaoa o alaala ai. O le totoina o fualaau aina ma fualaau taumafa mata, o se fesoasoani tele lea mo le faasaoina o tupe alu, ae o se faaola totoga foi i le tulaga o le soifua maloloina.
O le mea moni ua matuā taugata lava lenei vaitaimi, pe a faatusatusa i le sefulu tausaga talu ai. Ua fai lava si televave o le agai i luga o tau o oloa ma taumafa, ae ua sili ai ona televave suiga i le soifua maloloinafoi latou ia.
E tele foi se sao o le taugata o le soifuaga e avea o se pogai o ma‘i ma gasegase o le tino ma le mafaufau.
O le popole ma le atuatuvale i le utiuti o le faasoasoaina o tupe a le aiga, o se avega mamafa, ma o le a fai ma amataga ma faatupu ma‘i i le tino ma le mafaufau, ma aafia ai le tino atoa.
O nisi ia o talitonuga ma molimau a alii fomai, o i latou o loo vaaia le soifua maloloina o tagata lautele. O le toe vaaia ma le molimauina o tuamaota o le afioga ia Tuilaepa Elise o Magele, ua manatu ai e toe faamanatau pea, ma toe fafagu le tāua o le gagauina o le vao, ma le totoina o le laueleele.
O le vaiaso na tea nei, sa toe feiloai ai ma lea foi tamalii o le atunuu, ma toe molimauina ai e le Samoa Times, le lauusiusi, lauolaola ma le toe totogo a‘e, o le tele ma le anoanoai o fualaau aina i lona tuamaota. O le soko, o kapisi i soo se ituaiga, o pi uumi lapopoa, ma pi laiti, maukeni, avoka, moli, o le fa‘i ma le talo, ma o foliga ua lē ese ma se vaaiga e masani ai ma Samoa.
O le molimau a Tuilaepa e faapea ua savalia ma le ono tausaga, e lei toe faamaimauina se seleni a le aiga e toe faatau ai se kapisi, ma isi fualaau aina.
O le mafuaaga ona o loo maua uma lava, ma o loo vaoa ai ona tuafale i pi, soko ma isi.
E oo lava foi i moli, o le fa‘i ma le tele o isi mau fualaau aina eseese o loo tua lava i ai, ma o se fesoasoani tele foi lea i le tulaga o tupe alu, ma seleni faasoasoa a le aiga. Afai ae faamalolosi tagata uma e totō ma galueaina le laueleele , o le a faatumauina pea ona faamanuia mai le Atua, ma penefiti ai aiga uma.
O le vaiaso lava foi talu ai, sa faato‘ā taliu mai ai Tuilaepa mai le atunuu, ma sa ia molimauina ai le tulaga lelei ma le tamaoaiga ua iai le atunuu. Ae na pau le tulaga sa maitauina, o le tau lē vaaia lea o le soko ma isi fualaau sa masani ai i le maketi, faapea totonu o nuu ma afioaga.
Ua toe faamanatu mai e tuamaota o Tuilaepa, se isi feau tāua tele ma le aogā mo tagata ma le mamalu o Samoa, ina ia faaauau pea ma faatumauina le galulue malosi ma le totoina o le laueleele, mo taumafa a le aiga, a o se fesoasoani foi mo tupe faaalu i le faatau, a o loo maua fua i le laueleele o loo alaala ai.
