Faamaonia uma moliaga o Alai’asa ma Moefaauo
“E lē oge tagata lo matou nuu o Falefa i se isi sui e tulai mai i le tofi faipule o le itumalo”…le afioga ia Alai‘asa ua toe faaleaogaina lona tofi faipule
Ua sauni le afioga Alai‘asa Filipo sa manumalo i le palota mo le tofi faipule o Anoamaa i Sasae e toe foi i ona tiute faatausi aiga ma le faafoeina o ana pisinisi, ina ua soloia lona tofi faipule i le faaiuga a le faamasinoga o faigapalota, ina ua faamaonia moliaga e tolu o faatosina faaalatua lea sa tuuaia ai e Moefaauo Lufilufi, o le sui sa seei i le tofi faipule o le itumalo i le paeaiga ua mae‘a a le Palemene, ae e lei toe filifilia i le palota tele i le masina na tea nei.
“E lē oge tagata lo matou nuu o Falefa i se isi sui e tulai mai i le tofi faipule o le itumalo”. O le finagalo lea o Alai‘asa na tali ane ai i fesili a tusitala ina ua mae‘a ona fofogaina le faaiuga a le faamasinoga.
Na ia faailoa ai foi sona manatu ua tatau ona toe teuteu le tulafono o faigapalota ina ia mafai ona aiaia ai le faia o ni tala o le tupe mo sui tuva e fia ulufale i le taaloga o polokiki i le sailia lea o se tofi faipule o le itumalo. “Ua ese foi lenei vaitaimi i lo‘u iloa i mea nei o palota”, na ia faaalia ai i tusitala.
O moliaga e tolu ua faamaonia o lē sa avea ma faipule e mafua mai i ni tupe na tuuina atu e nisi o sui sa lagolagoina o ia poo lana komiti.
O le Aso Toonai 13 o Novema 2010 i se faatasiga mo faatosina o le palota poo se campaign rally i Falefa a o auai ma Alai‘asa Filipo, na ave ai se $200 tala i nisi mai le nuu o Salesatele.
O i latou ia e aofia ai Latuivai Sio, Sameme Faleagafulu, Tauamo Fea, Faataui Tauamo Fea, ma Satoa Ilalio. O se gaioiga na atagia ai se taumafaiga faalatua ma le faamoemoe ia faamautu le lagolago a ia tagata i le afioga Alai‘asa mo le palota.
O le isi moliaga na faamaonia e faapea o le Aso Gafua, 21 o Fepuari 2011 i Sauano i Fagaloa na ave ai e se tasi o le komiti o Le‘iato Fineaso se $200 ia Fuauli A‘emalo o se matai palota o Sauano.
O le moliaga lona tolu na famaonia e faapea o le Aso Lua aso muamua o Mati 2011 i Faleapuna na ave ai e se tasi o matai e faapea o le taitaifono o le komiti a Alai‘asa o Savea Sione se $200 ia Mavaega Lepaio o se tagata palota mai le nuu o Falefa.
O ia gaioiga uma na faaalia e le faamasinoga na manino ai se taumafaiga faaalatua a le faipule ma lana komiti e tauanauina le lagolago a ia tagata e palota mo le sui na manumalo. O isi tuuaiga e valu faasaga i le faipule ua soloia lona tofi e lei faamaonia ma ua faaleaogaina e le faamasinoga.
O Moefaauo Lufilufi e lima moliaga poo tuuaiga na faamaonia faasaga ia te ia. O moliaga ia na faaulu e Alai‘asa Filipo Schwarts Hunt. O le Aso Sa lona lua o Oketopa 2010 na avea ai le tausi o Moefaauo ma ona sui i le tuuina atu o se $100 i le Pulenuu o Manunu o Manutufatufa Maugatai.
E lē gata o se matai o se tasi o nuu o le itumalo o Anoamaa i Sasae ae o se tagata palota foi o lea itumalo. O le Aso Lua, 22 o Fepuari 2011 i se fono na usuia i le maota o lē na tagi i Lufilufi na tufatufa ai e Moefaauo ma lona tausi o Maria Peleise Ioane ni tupe i tagata palota e pei o Faitaumatau Eli Matavao, Sou Siliato, Loi Alo, Visesio Fanua, Safata Tasi, Samoa Letoa, Valelia Pasitale, Lasela Tuiai ma Liui‘a Matulino, Fanualelei Lafaele, o Alai‘asa Tavita, ma isi tagata palota o Falefa.
O le moliaga lona tolu na faamaonia faasaga ia Moefaauo e faapea, o le Aso Lulu, 2 o Mati 2011 i le maota o lē na tagi i Lufilufi faatasi ai ma lona tausi o Maria Peleise Ioane na ave ai se ta‘i $50 tala ia Puao Mafi ma Tolai Solia o ni tagata palota mai le nuu o Manunu.
O le Aso Tofi 3 o Mati 2011 na ave ai e Moefaauo ma lona tausi o Maria Peleise se $200 tala ia Faai‘u Taufafo ma lona tamā mai le nuu o Falevao, faapea se $100 ia Malia Polutele o se tagata palota mai le nuu o Falefa. Ma le moliaga lona lima na faamaonia e faapea o le aso 4 o Mati 2011 lea na faagasolo ai le palota na ave ai e lē na tagi e ala i lona tausi ni tupe e pei o le $50, ma le $100 i sui o komiti sa lagolagoina Moefaauo Lufilufi.
Faaalia e le faamasinoga o nei gaioiga uma na faia ma le faamoemoe e faatosina tagata palota i se auala faaalatua. Ua tālia nei se aso e valaau ai se palota laitiiti e toe sailia ai se tofi faipule o Anoamaa i Sasae.
O isi tuuaiga uma faasaga i lē na tagi ua lē faamaonia. O loo faagasolo pea faamasinoga o isi tagi o le palota.
