Quade Cooper - Photo: Planet Rugby

Quade Cooper – Photo: Planet Rugby

O lē na tia’i e le Wallabies ua toe aumai i totonu o le li’o mo le Ipu o le Lalolagi (Rugby World Cup RWC). O le tala fiafia lea mo Quade Cooper lea na lē manao iai Michael Cheika mo le Wallabies i le lua tausaga talu ai. Ae ua toe foi i totonu o le ‘au mo tapenaga mo le RWC i Iapani.

E lē na’o le pau lea ae o faigata na feagai ma Cooper na amata mai ina ua lē ausia e ia le ‘au a le Queensland Reds i le Super Rugby. E lei filifilia o ia i le ‘au e le faiaoga fou Brad Thorn ma misi atoa ai le avanoa e taalo ai i le Super Rugby. Na avea lea ma faigata i le faiaoga o le Wallabies ona vaaia Cooper i taaloga maualuluga e fua iai lona aogā mo le Wallabies.

O le isi lave na feagai ma le alii taalo o lona naunau lea e toe maua sona avanoa i le Reds, ae lē alu e sue se isi au Super Rugby e taalo ai. Na ta’ua e Cheika i le amataga o le 2018 e lē mafai ona tuu se avanoa ia Quade Cooper pe a lē taalo i le Super Rugby. Na manao le faiaoga e alu Cooper e taalo i se isi ‘au i totonu o Ausetalia, peitai na musu le alii taalo ona o lona manao e nofo i totonu i Brisbane.

Ae o le masina mulimuli o le tausaga na tea na sainia ai e le Melbourne Rebels Cooper mo le tasi tausaga. Ua maua ai le avanoa e taalo ai mo le Super Rugby ma avea ai lea ma tulaga ua toe valaaulia ai o ia mo le Wallabies.

Michael Cheika

E lē na’o Quade Cooper ua toe maua lona avanoa i le Wallabies, ae ua faapea foi le faiaoga Michael Cheika ua faamaonia lona avea pea ma faiaoga o le Wallabies. O le masina o Oketopa na fai ai le filifiliga tele a Rugby Australia i le faiaoga mo le RWC.

Na matuā fesiligia le tumau pea o le faiaoga ia Cheika ona o faaletonu masani na feagai ma le Wallabies i le 2018, e na’o le lima taaloga na manumalo ai le ‘au i le tausaga atoa, faapea foi ma faia’ina ia Wales, Ireland ma England i le masina o Novema i le tausaga na tea nei.

Na iai le faitau o le a tuli ese Cheika mai le tofi ae tuu atu i se tasi faiaoga fou e tapenaina le Wallabies mo le RWC. Peitai, i le filifiliga a Rugby Australia o loo ta’ita’ia e le tamaitai Niu Sila (NZ) Raeleen Castle ua toe tofia ai Cheika e tumau i lona tofiga seia uma le tausaga.

Ae e iai le suiga laititi, ua iai le tagata fou e pulea galuega a Cheika i le a’oina o le Wallabies. O le tulaga lea ua tofia ai Scott Johnson e avea ma Pule Sili o Faatinoga (High Performance) o ia lea o le a vaaia ‘au uma a Ausetalia faatasi ai ma le Wallabies.

O lona uiga o le a lē toe talanoa sa’o Cheika i le CEO ma le Board, ae o le a tali sa’o ia Johnson, o le a ia faatonuina vaega eseese o le galuega a Michael Cheika ma isi faiaoga a Ausetalia.

Ua avea ai le toe foi o Quade Cooper i le ‘au e toe galulue ai ma Cheika mo le lelei o le Wallabies.

Ae o le a tulimataia pea le sini o le faamoemoe, o le lelei lea o le ‘au pe taunuu pe leai.