Ua toe masuiga mālie le vevesi sa aafia ai le lotoifale o le Koluse Mumu a Samoa ina ua mae’a ona filifilia se Komiti Faafoe lē tumau e tauaveina galuega mo le ono masina, ae o le fonotaga faapitoa sa usuia na faamaonia ai lea komiti sa molimauina e toalua alii leoleo o le Malo faapea ni alii ofisa o le puipuiga poo security officers mai le auaunaga a le KL Security na leoina le filemu o le fonotaga sa usuia i le afiafi o le Aso Tofi 22 o Setema i le maota o le sosaiete a tausi soifua i Motootua.
O se vaaiga lea na tuufesili ai nisi pe aisea ua aami ai alii ofisa o le puipuiga lautele ma alii leoleo o le Malo e foliga o le a iai se vevesi e tupu.
Peitai o le amataga o le fono e oo i lona faaiuga e leai se mea na gase ona sa lelei le faafoeina e le Komesina o Sulufaiga poo le Ombudsman le afioga Maiava Iulai Toma.
O le fono lea a le Koluse Mumu ua faamaonia ai sui e to’a sefululima ua avea ma sui o se komiti o le a pulea le faalapotopotoga mo le umi e 6 masina, ma o le a feagai foi i latou ma le tapenaina o le fono faaletausaga a le Koluse Mumu a Samoa o le a faia i le masina o Mati o le tausaga fou 2012 lea o le a mae’a ai le ono masina o le taimi o le pulega a le komiti lē tumau.
O le afioga i le Komesina o Sulufaiga na tofia mai e le Faamasinoga Maualuga e na te taitaia le fonotaga ma saili nisi sui e toalima o le komiti, ae filifilia foi e itu e lua na aafia i le vevesi na mafua ai ona malepe ma salalautasi le maopoopoga o le pulega o le Koluse Mumu, a latou sui ta’i lima e atoa ai le 15 o sui o le komiti lē tumau.
Ua faamaonia le filifilia o i latou ia i le fonotaga sa usuia, ma e sefulu aso ua ave i ai e soalaupule ai e latou le filifilia o se tasi e avea ma taitaifono ma Peresitene lē tumau o le Koluse Mumu seia oo ina usuia le fono faaletausaga e toe tofia ai se Komiti Faafoe. O le folasaga a le afioga Maiava Iulai Toma na ia toe tolaulau ai tulaga na aliali mai i le vevesi a le faalapotopotoga seia oo ina taunuu i le faamasinoga.
Na ia faailoa foi lona taofia o le fono faaletausaga sa fuafua i le masina o Aukuso ina ua aliali mai ni faiga lē manuia i le lesitalaina o sui auai o le faalapotopotoga mo le sauni i le palotaina o tofiga poo sui o le komiti faafoe.
O le lē taunuu o lea fuafuaga na suia ai loa i le faia o le fonotaga poo le general meeting sa tuuina atu ai sui ua faatutu atu mo le komiti lē tumau e pei ona faamaonia.
E lē o se galuega faigofie o le a feagai ma le komiti e pei ona faaalia e se tasi o sui auai o le faalapotopotoga.
O le failautusi le faletua o Namulauulu Tautala sa tolaulauina le lipoti i galuega ua mafai ona faatino i nai tausaga ua tuanai ma le ono masina ua mae’a o lenei tausaga ae o le afioga Matatauali’itia Afa Lesa na saunia le tala o le tupe lea na ia faaalia o le a auiliili uma faamatalaga o le faaaogāina o seleni a le faalapotopotoga i lana fono faaletausaga ia Mati o le tausaga fou.
Sui o le Komiti filifilia
Dr Lealiifano Iopu Tanielu, Iulia Kelekolio, Tuala Oli Ah Him, Meletiole Fune, Lei’ataua J Eteuati, Jerry Brunt, Jewel Cook, Lia’i Iosefa, Netina Cole, Ma’ilo Pesamino, Matatauali’itia Afa Lesa, Matai’a Lynn Netzler, Reverend Nuuausala Si’utaia, Taito John Roache, ma Tanya Meredith Stunzner.
