O le falepuipui tuai i Vaiaata Savaii

O le mae’a o le asiasiga a le Kapeneta i Savaii i le vaiaso na tea nei ua iai le faamoemoe o le malo e faaono toe silasila i le tulaga o loo iai le falepuipui i Savaii. 

O le saunoaga a le palemia, le Susuga Tuilaepa Lupesoliai Sailele Malielegaoi, na ia faaalia ai, o loo lelei pea le falepuipui i le taimi nei i Savaii, peitai, ua faaalia i lipoti, le faatupulaia o le faitau aofai o pagota taofia i le falepuipui i Vaiaata i Savaii.

Peitai e iai lona eseesega ma Upolu i le falepuipui i Tanumalala. 

O Savaii lava ia, e ese ma le amio lelei o pagota i le motu tele, e seāseā lava ona sola i tua se pagota, e lē pei o Upolu e ese ma le faalogogata o pagota, e fai ma sosola i tua.

“O le asia o le falepuipui ma fuafuaga e toe fausia, ona ua toatele le aofai o i latou o loo nonofo i le toese i Savaii, aemaise o le asia o latou atina’e fa’i o toga fala o loo tua i ai le tausiga oi latou, e lē gata i lea ae o le lagolago mai foi i le tausiga o pagota i Tanumalala.”

O loo iai le faamoemoe e faamae’aina le galuega o le falepuipui i Savaii i le faaiuga o Iuni i le tausaga fou. 

O le galuega o faia nei e aofia ai le faleupuipui e nonofo ai pagota e oo atu i le 100, ma le ofisa fou mo galuega a le pulega ma leoleo. 

O le asiasiga foi lea a le Kapeneta, na silasila ai le malo e toe asia ai malaevaalele i Maota ma Asau, ona o le naunautaiga a le malo ina ia toe faaola mai le Polenisia ma taumafai e toe faaaogā mo femalagaa’iga faapitoa.

“O loo lelei lava le malaevaalele, e ui ina taofia muamua ona o le tulaga tau tupe maua, peitai ua silasila le malo e tatau lava ona toe faalelei atina’e ia a le malo.”

E faapena foi la ona toe silasila le malo, i le toe faaleleia o le uafu i Asau lava lea na faaalia e le Palemia, o loo lelei, peitai e moomia ona toe faalautele le ava ina ia mafai ona ofi atu i totonu vaa tetele ma meli tetele.

Peitai o le asiasiga foi lea a le Palemia ma lana Kapeneta ua faapea ai foi nisi o faiga faapolokiki, ona ua lata faigapalota tele a le atunuu, ma o faiga faatosina ia a le vaega faaupufai a le HRPP.

Ae na manino le saunoaga a le Palemia, o faiga masani lava ia a le Kapeneta ma o asiasiga masani foi ia e faatino, auā e tatau ona mataituina e le Kapeneta atina’e a le malo mo ona tagata lautele, ina ia lelei ma ia saogalemu mo tagata uma.

O le tele foi o atina’e ua faatino i Savaii, o loo sologa lelei, ma o nisi o vaega na faaalia e le Palemia, ua iai nisi o faalavelave ua tulai mai ai, pei o le alalaupapa i Lano, lea na tafea ai le pasi ma manunu’a ma aafia ai soifua o tagata pe a oo ina pa le vaitafe, ua silasila i ai le malo e ao ona faaleleia.

“O le vaega tāua lea e ala ai ona faatino asiasiaga a le malo e silasila foi i le taimi talafeagai, ae lē o le faapea mai o ni asiasiaga faapolokiki ona o le faigapalota tele a le atunuu, o le mea lelei mo Upolu e lelei foi ma Savaii.” Saunoa foi le taitai o le atunuu ua lata ina mae’a le isi auala laupapa lea o loo fai nei i le Maliolio, ma o le faamoemoe lava o le malo ina ia sologa lelei femalagaa’iga a le atunuu, i le motu tele i Salafai aemaise o tagata tafafao mai fafo e malaga atu i Savaii. 

O loo fuafua le asiasiaga a le malo, mo le motu i Upolu nei.