Toe fausia le fale i Slacks Creek

Toe fau le fale i Slacks Creek lea na maliliu ai le to‘a 11

i le masina o Aukuso 2011

 

E ui i se tulaga lelei ua ataata mai o le toe faafouina lea o le fale na faatama‘ia ma maliliu ai tagata e 11 i le masina o Aukuso i le tausaga ua mavae, peitai e lē mafai ona galo foliga lalelei o aiga ma le misia ai o le mafutaga mafanafana.

Ua amata ona  faagasolo ma fuafua le toe fausiaina o le fale o le susuga i le alii Toga o Tau Taufa ma si ona afafine o Tracey Taufa faapea si ona toalua, le alii Samoa o Petelo.

Ua iai le faamoemoe na o le pau ia o tagata e toatolu o le a nofoia le fale 5 potumoe ona ua maliliu ma toesea le isi to‘a 5 e ese mai i le faletua o Faalafi Ieremia ma le fanau e to‘a 5.

O lea galuega o le fale e 5 potumoe ua fuafua e fauina i le fausaga faaonapo nei i le aai lava o Slacks Creek.

O seleni sa tuuina atu e le Salvation Army mo Tracey ma si ona tamā e lata i le 90 afe tala tupe Ausetalia, na tuuina uma atu i le Konekarate a le PLF Company ma ua mae‘a foi ona sauni le Kamupani a le Hutchins e fesoasoani mai mo le fausiaina o lea galuega. O le Aso Tofi o le vaiaso ua tuanai na faamalū ai ma sua le palapala faapea foi ona iai nisi o faafeagaiga Toga mai le Ekalesia Uniting sa faapaiaina lea fanua. Sa auai foi le tamaitai premier o Ana Bligh, faapea nisi o malo faaaloalogia e iai Pam Parker ma Evan Moreheads.

Sa auai foi le aiga o le susuga ia Misi Matauaina ma nisi o alo o le afioga ia Galumalemana Naea Timoteo o i latou nei o Diane ma Mika faapea Cathy Timoteo sa faamalosiau ia Tracey ma si ona tamā i taimi o mafatiaga.

O le uiga lelei lea o tatou Samoa o le fefaamalosiai pe a mafatia se tasi. Momoli le faafetai i le tamaitai o Cathy Timoteo mo le fesoasoani i le ripoti ma ata na tuuina mai.