O le tu’uga fautasi o se tasi lenei o taaloga e masani ona tulituli e le atunuu e fia matamata iai i le taimi o le sisigafu’a poo le faamanatuina o le Tuto’atasi o le atunuu, faapea foi le taimi o polokalame faagasolo o le Teuila i le masina o Setema o tausaga taitasi. Peitai ua le toe vaaia ai ni tuuga fautasi mai nisi o tausaga ua tuana’i. O le tausaga e 2016 na gata ai le tuuga fautasi mo polokalame o le Teuila e pei ona sa siamupini ai i lea tausaga le fautasi a le Little Rina mai le afioaga o Toamua, tulaga lua ai le Tolotolo o Tamauli mai Salelologa i Savaii, tulaga tolu iai le fautasi o le Telefoni o le Vainuu mai Manono, tulaga fa le fautasi o le Sagato Petelo Sagele mai Manono ae tulaga lima ai le God is Good mai Amerika Samoa.
O le tausaga lenei ua manatu ai le pulega o Tagata Tafafao maimoa mai fafo poo le ofisa o Turisi, e tatau ona toe faataunuu le Tuuga fautasi mo le teuila. Saunoa se tasi o sui sinia o le pulega o le ofisa o Turisi le susuga ia Fanaea Natuitasina Taulealo, o lo o iai le faamoemoe o le Komiti mo le teuila o lenei tausaga ina ia toe aumaia ai le tuuga fautasi ona ua to’atele lava tagata o lo o tu’ufesili pea poo afea e toe faia ai lea faagatamailetai ua masani ai le atunuu.
Saunoa Fanaea, na mafua lava ona le toe faia ai lenei taaloga a Samoa i le taimi e faamanatu ai le Teuila o Tausaga taitasi, ona o faitioga a nisi o nuu ma afioaga i le laititii tele o le seleni o loo maua atu i faailoga pe a maea tuuga fautasi. O le mau a nisi o nuu ma afioaga, e tele tupe e faaalu i le tausiga o le auva’a ao tapena mo tuuga, ae a maua mai faailoga tupe e le taitai ona fetaui ma le faasoa, ona o nisi o afioaga e muamua ona te’a le tupe mo faifeau o le nuu, sosoo atu ai tulatoa ma le aufai upu o le nuu, o le tupe mo le tapuaiga a le nuu, ae o le tupe e totoe ai, e tau faasoasoa lea mo sui o le auva’a, ma e mautinoa lava le le maua o se selau tala mo sui taitasi o le auva’a. O i tonu lea na mafua ai ona musuā finagalo o nuu ma afioaga e toe auai ai i tuuga fautasi o le teuila. Sa iai lava le faamoemoe i le tausaga e 2017 e faaauau ai pea le tuuga fautasi peitai e oo ane lava i le taimi o le teuila e le’i atoa ni fautasi se lima na resitala atu.
O le naunautaiga o le komiti o le teuila mo lenei tausaga ina ia atoa ni fautasi se lima pe sili atu foi e faataunuu ai le tuuga fautasi o lenei tausaga. Ua mae’a foi ona logoina nisi o afioaga o lo o iai pea a latou fautasi ina ia mafai ona tapena mamao atu i le masina o Setema o le tausaga nei. O lo o iai foi le faamoemoe o le komiti ina ia tuuina atu se tusi valaaulia mo se fautasi mai Amerika Samoa e auai mai i lenei tausaga. O lenei faamoemoe o lo o matua lagolagoina e le kapeteni o le fautasi a le afioaga o Toamua, le siamupini o le Teuila 2016.
