O le palota tele o le 2001 o se tasi lea o faiga filifiliga sa vevela ai ogaumu o le vaega faaupufai o le SNDP (Samoa National Development Party). O se tasi lea o faigapalota tele sa faatoa ou vaai ma feiloai ai i le afioga Vui Masinamua i totonu o le SNDP. Na sosoo ai ma le palota tele o le 2006 e lē muta le faamaopoopo pea o lea tamalii i taumafaiga a le pati taimi a’o avea le Tamaaiga le afioga Tupua Tamasese Efi ma ta’ita’i.

O le afioga Vui Masinamua ma le faletua o Naomi. O loo i Samoa Vui e tapena le pati o le Samoa National Development Party poo le SNDP e tauva ni ona sui faatutū i le palota tele o le 2021

Na suia foi le ta’ita’iga i le afioga Le Mamea Ropati o loo iai lava i totonu Vui. Ina ua malosi fesootaiga faatekonolosi ma masua mai i fafo le tele o mau tuua’iga faasaga i le Palemia ma le faigamalo o loo iai nei, sa aliali ane ai i luga ma le suafa o Vui Masinamua ina ua tuua’ia o ia lea o loo faagaioia le fesootaiga o le Olp. Na lele ane ai ma finagalo faaalia o le toatele e aofia ai ma le Palemia susuga Tuilaepa L Sailele Malielegaoi, ma togi le lu’i ia Vui a iai sona loto ia foi atu i Samoa e tauva i le tofi faipule.

O le vaiaso ua mavae le amataga o le masina fou lenei o Mati na toe tulaueleele ai i Samoa lea tamalii ma lona faletua. O le autu o lona toe asiasi i le atunuu ia toe fafagu i luga le vaega faaupufai o le SNDP ua leva tausaga o galoma le igoa ua lē toe aliali mai. O lona faamoemoe ia toe tauva ni sui o le SNDP i le sailia o tofi faipule o le Palemene i le palota tele a le atunuu i le tausaga e 2021. “Atonu e fesili tagata pe aisea ua ou toe manao ai e faaolaola le SNDP, ae mo le silafia o le pati lenei sa tauva lava ma le HRPP i le tele o palota ua tuanai, ma o lo’u manao lena ua mafua ai ona ou toe sau”. 

Sa feiloai Vui ma le Tamaaiga le afioga Tui Atua Tupua Tamasese Efi, ae sa augata se finagalo o Vui e talanoa mai i le tusitala i le la feiloaiga. “E faigata lava ona oo iai sa’u  faamatalaga i le itu lena”. E lē o iloa pe aisea ua lē mafai ai ona faailoa e Vui le la feiloaiga, ae ua maua e le tusitala ni molimau faatuatuaina e latalata i le Tamaaiga ua faaalia ai na ta’u manino lava e Tupua Tamasese Efi ia Vui, e lē toe fia auai i ni polokiki ona ua matua lona soifua. “Sa iai foi nisi o tamalii sa avea ma faipule sa omai i le tausaga ua mavae ma feiloai ma le Tamaaiga, o le mataupu lava lea pe o toe fia auai le toeaina i polokiki.

O loo naunau Vui o lona taimi lenei e avea ai ma ta’ita’i o le SNDP, e fuafua i se finagalo o sui lagolago o le pati aemaise o sui na faavaeina. O le Tamaaiga o se tasi o sui faavae o lea pati faaupufai.