Fia ola e, i le vave ona toe tapisa le Atu Europa i se uila ua emo faafuasei e lei vaaia muamua! Na matuā lailai le ‘au malosi a Niu Sila le All Blacks ina ua vaaia i lea taaloga le tulagaese o le alii Samoa, le tamaitiiti na soifua a‘e i Savaii, lea ua alalaga fiafia ai nei Egelani, ae avea ai o se Kerisimasi faanoanoa mo Niu Sila, ona ua toe faavevesi lava e le alii o Manu Tuilagi, le mitamitaga o Niu Sila i lana Mighty All Blacks.
Tainane lava o la sa tuu atoa le loto o le tama e taalo ai mo le atunuu (Egelani) ua nofomau ai nei, ma maua ai lana seleni tele i le lakapi, ae o lona tauaveina o le igoa o le aulakapi a le atunuu, le Manu Samoa, ua lava lena e atili vili tiga ai Niu Sila ia Samoa i lenei foi vaitaimi i le lakapi, a o tau faaiuiu le 2012.
Atonu na matuā faateia sauniuniga a Niu Sila ina ua vaaia le faiga sauā a le alii o Manu Tuilagi i le faatamoeina o le polo i le laina i tua a Egelani. Ua faapei o ni savili e fepasiai i le va o tagata le tau fai autilo solo a o momo‘e le alii o Manu ma ia faatoilaloina le laina puipui a le All Blacks.
O le mea e maofa ai le toatele ona o le agavaa, tomai, ma le malosi na mafai ai ona ia faatepa ai Niu Sila poo le All Blacks i le taaloga e sili ona faamemelo i ai, ae ua mafaia e lenei alii ona sikoaina ai ‘ai mo Egelani ae faapea foi lona sogasogā e faatietie nisi ona uso ina ia latou kolosiina foi le laina sikoa.
Ua talanoaina e tusitala o le taaloga lakapi, tagata faasalalau aemaise tusitala o niusipepa le mataina tele o le faatoilaloina o Niu Sila i le taaloga lea, e ui lava i isi taaloga ua mavae, ae ese mai lava le taaloga lea ua matuai olopalaina ai e Egelani le All Blacks. O Niu Sila foi latou o loo faalogoina ai le fiafia fai a‘e o le toatele ina ua faatoilaloina le All Blacks.
Masalo o malaga taamilo a nisi o aulakapi mai i lenei itulagi i le atu Europa e pei ua foliga mai ai se vaaiga faapopole loto i atunuu o loo maualuga tulaga i le taaloga lenei o le Lakapi, i le suiga vave lea ua agai atu nei i ai ‘au mai i lenei itulagi. E lei mafai ona toe faatoilaloina le All Blacks mai lava ia Aukuso o le tausaga talu ai, peitai o le vaiaso na tea nei lea sa maimoa ai le lalolagi i le mafaia e Egelani ona manumalo ia Niu Sila.
E ui lava i le finau atu o Niu Sila i le taaloga peitai ua foliga mai ua see le vaa o Egelani, manatu e anoanoai vaega o le taaloga na faamauina e Niu Sila e sauniuni agai i ai mo nisi tapenapenaga auā le agai atu i luma. O se taaloga mataina e ui lava i le tele foi o nisi o tala e faatatau i aafiaga o tama taaalo a Niu Sila i nai faafitauli tau gasegase. E silia ma le valusefululua afe i latou sa maimoaina lea taaloga na manumalo ai Egelani i ‘ai e 38 i le 21 a le All Blacks.
Ua avea le taaloga a Egelani ma le All Blacks ma mafuaaga ua tapisa ai le tele o ‘au tetele, ua ese le mea ua agai nei i ai le lakapi, pei ua foliga mai ua uma aso la sa faigata ona faatoilaloina ‘au tetele. E sa‘o ai le upu “O le fuata ma lona lou”.
Talosia ia vave faailoa mai le faasologa o taaloga mo le Ipu o le lalolagi i le 2015 i le taaloga lava lenei o le lakapi, se‘i tatou toe vaaia ai nisi iuga faapea o taaloga faitaulia faavaomalo.
