Ua silia ma le lua tausaga talu ona faaleagaina se tasi o maota o le Malo i Vaiala i le afi.
O lea maota sa faamautu ai lana afioga i le Sui o le Fono a Sui Tofia poo le Sui Ao o le Malo, le afioga i le Tamaaiga, Tuimalealiifano Vaaleto’a Sualauvi II ma lana Masiofo o Faamausili Leinafo Tuimalealiifano.
Talu mai le taimi na faatama’ia ai i le afi le maota sa taatia ai lava e lei faia i ai se galuega.
O le taimi nei ua toe fausia le maota e le Malo o Samoa lea o loo feagai ma le Matagaluega o Galuega Tetele a le Malo le Ministry of Works, Transport and Infrastructure.
Faaalia e se molimau faatuatuaina o le faamoemoe pe a mae’a le galuega, o le a toe afio ai le Sui Ao ma lana Masiofo. O se tasi o maota o le Malo i Motootua e faafesagai ma le isi maota o le Malo o fausaga tuai o iai le ofisa o le Ao Mamalu o le Malo, sa faamautu muamua ai le Tamaaiga ma lona aiga.
Peitai o se faalavelave foi tau mu na aafia ai lea fale le mafuaaga na siitia atu ai lana afioga ma le Masiofo i le maota numera fitu i Vaiala.
O loo sosoo le maota lea ma le isi maota o le Malo o loo faamautu ma nofoia e le afioga i le tamaitai Minisita o Faamasinoga le Afioga Fiame Naomi Mataafa.
E lei manuia sailiga mo se faamatalaga mai le matagaluega o galuega tetele a le Malo o loo fausia le maota fou pe fia se tau atoa o le galuega e aofia ai ma le faatotogaina i ona vaega masani i le lotoifale e aofia ai meafale.
O le taimi nei o loo afio le Tamaaiga ma lana Masiofo i lona afioaga o Falelatai.
O le faaiuga o le masina fou o Setema e pei ona faaalia e le molimau e tatau ona mae’a ai le galuega o le fale fou, ma sauni ai loa e toe tapena i ai le Sui Ao ma lana Masiofo.
O le nofoaga i Vaiala e faafesagai ma le sami o loo iai le matafaga lauoneone o loo iai nisi o fale o le Malo e aofia ai ma le maota fou o loo fausia, faapea isi maota tuai o loo nofoia ma faamautu ai nisi o tagata faigaluega sinia a le Malo e pei o le failautusi o le Fono Aoao Faitulafono.
