O le taimi muamua lenei faato’ā toe faatasi ai alii taaalo ma le pulega a le Manu Samoa o le 1991 ma le Manu Samoa o le 1995 talu le luasefulu tausaga ua tuanai. Faaalia e Papaliitele Peter Fatialofa o lē sa avea ma kapeteni, “O la matou faatasiga o lo matou sao foi lea mo le tapuaia o le aulakapi a lo tatou atunuu mo le Ipu o le Lalolagi 2011 o loo faia i Niu Sila.”
O le Ipu o le Lalolagi 1991 i Europa ma le Ipu o le Lalolagi 1995 i Aferika i Saute, pau lea o le taimi na mafai ona ausia ai e le Manu Samoa le quarterfinal a o faaigoa o le aulakapi a Western Samoa.
I le malolo ai o le Manu Samoa i lana taaloga ma Wales i Hamilton, ua tumau ai pea le isi matatia na faatū e le Manu Samoa 1991 i le toilalo ai o Wales i lona malae tautaua o Cardiff Park.
O taamilosaga o le 1991 ma le 1995 na faatū ai foi ma le isi matatia ina ua faatoilaloina e le Manu Samoa le ‘au malosi a Argentina mai le konitineta tele o Amerika.
O nisi nei o matatia o loo talanoa ai pea le au faasalalau o lakapi a le lalolagi ma o le a lē galo ai suafa o toa manumanu o le Manu Samoa 1991 e pei o le kapeteni ia Papaliitele Peter Fatialofa, sui kapeteni ia Stephen Bachop, Vili Alalatoa, Stan Toomalatai, Mata’afa Keenan, Mark Birtwistle, Saini Lemamea, Eddie Ioane, Apollo Perelini, Sila Vaifale, Pat Lam, Malaki Iupeli, Too Vaega, Anitelea Aiolupotea, Keneti Sio, Frank Bunce, Brian Lima, Timo Tagaloa, Danny Kaleopa, Matthew Vaea, Tu Nuualiitia, Filipo Saena, Tupo Faamasino, Junior Paramore, Palemia Lilomaiava, David Sio ma isi.
O nisi o tama iloga o le Manu Samoa 1995 sa aofia ai Darren Kellet, Fereti Tuilagi, Michael Umaga, George Leaupepe, Esera Puleitu, Fata Sini, Vaa Vitale, George Latu, Michael Mika, Tala Leiasamaivao, Brendan Reidy, Lio Falaniko, Potu Leavasa, Daryl Williams, Sham Tatupu ma isi.
O le faatasiga lenei a tama tuai ma le pulega a le Manu Samoa 1991 ma le 1995 na faamatalaina ai le tele o tala mālie a o nisi tala e faamomoi loto i faiagata e tele a o tau faaofi le Manu Samoa i le taamilosaga a le Ipu o le Lalolagi. Faaalia e Papaliitele le tele o le sao o nisi o tamalii e pei o Laauli Alan Grey, Tuatagaloa Joe Annandale faapea le alii loia o Bob Barlow ua fai i lagi le folauga.
Se tasi o vaaiga mataina i lea faatasiga o le auai lea o le afioga Tuifaasisina Brian Williams ma ofuina lana togiga Manu Samoa o le 1991 a o avea o ia ma Technical Advisor.
O se mitamitaga foi lea mo Samoa ona o le avea o Tuifaasisina i le taimi nei ma Peresitene o le Iuni Lakapi a Niu Sila o loo talimalo i le Ipu o le Lalolagi 2011.
Sa mafai ona faatasi ai foi i lea mafutaga le afioaga Su’a Peter Schuster sa avea ma faiaoga o le Manu Samoa i lea taimi ae ua avea nei ma Pule Sili o le Iuni Lakapi a Samoa.
Faaiu lenei mafutaga i se taumafataga faapitoa i le po o le Aso Faraile na tea nei, lea sa avea ai alii faasalalau Niu Sila o Keith Quinn o le TVOne ma Phil Gifford o le Radio Hauraki ma saunoaga aami o lea afiafi.
Sa faafetaia e Keith Quinn ia Lemalu Tate Simi sa avea ma taitai malaga o le 1991 mo le tuuavanoa atu ma avea ai le auaunaga a le TVOne ma faitoatoa e faalauiloa ai Samoa i le lalolagi.
Na faaiu lea afiafi matagofie i le siva a le Manu sa taitaia e le afioga Toleafoa Anitelea Aiolupotea. Fai mai Toleafoa a o lei amata le Manu, “Finagalo malilie ua lē sususa (tutusa) aso. Ae o tama nei na mua i malae.”
E lē iloa poo afea e toe maua ai se isi faatasiga faapenei. Peitai o le a avea pea ma tala tuu gutu ma tala tuu taliga a Samoa i tupulaga fai mai tala logologoa o le Manu Samoa 1991 ma le Manu Samoa 1995.
Fai mai Phil Gifford i lea afiafi, “O le Manu Samoa o le 1991 ma le 1995 e uigaese le amio pulea ma le tausaafia.” Masalo o le mafuaaga foi lea o le faaeaina. Manuia le Manu Samoa 2011 ma le tapuaiga a Samoa i tafa e fia o le lalolagi!
