O le asō e faamae’a ai le faainumaga o fualaau a le Matagaluega o le Soifua Maloloina ma le faamoemoe e maua uma lava tagata uma e tatau ona faatautaia lea faamoemoe.
O afioaga uma ua ta’ilua agai luga nofoaga tutotonu i totonu lava o nuu auā le agai i ai o aiga ina ia faatino le galuega o le faainumaga o fualaau.
O sui o le Malo i tamaitai ua fesoasoani i le matagaluega i le faamautu lea o lisi o suafa o aiga taitasi ma o iina e iloa ai poo ai ua inu fualaau ae o ai foi e lei faatino lea taumafaiga.
O le tuutuuga o lenei galuega tele ina ia amata atu ia i latou e ta’ilua tausaga le matutua agai i luga e tatau i tagata uma nei ona inu fualaau ma vailaau ua fuafua mo le atunuu.
Se’i vaganā ai le pepe fou seia oo i fanau e lei atoa le ta’ilua tausaga ma tina ma’itaga na o le pau lea o tagata e le inuina fualaau.
O le Afioga lava i le Ao o le Malo ma lana Masiofo aemaise o le Alii Palemia ma le Kapeneta, o i latou ia na faapea ona amatamea i lenei faamoemoe.
O le unai ua vaaia ai faasalalauga ua sosoo i luga o ofisa faasalalau ma nusipepa ona ua vaaia le faatuputupulaia o le numera o le atunuu ua toe maua ai siama o le filarisis, le siama o le mūmū ua feaveai e le anufe e nofo i le tino o le tagata.
O le anufe e mafua le oo i totonu o le tino o le tagata ona o le namu. Ua toe faamalosia faasalalauga ina ia fautuaina ai pea le atunuu i le faamamā o autafa o maota mai i le to’a ai o le vaivai ma ola ai le namu lea e mafai ona pipisi ai le faama’i lenei.
O le mūmū tutupa o se faama’i ua tatau ona lē toe vaaia i Samoa i lenei vaitaimi – o se faama’i na o atunuu matuā matitiva lava e lē mafai ona maua ai ni fualaau mo togafitiga. E ui o lea ua toe alia’e foi lenei gasegase, ma o le mafuaaga lea ua matuā agai lava le Matagaluega o le Soifua Maloloina ina ia tafi ese le mūmū tutupa mai i Samoa.
O se tasi o gasegase ua i lalo o le lisi o gasegase tuai e tatau ona oo atu i le 2015 lea e faagata ai galuega o faia nei mo Manulauti o le Meleniuma.
E tutusa lava ma le taumafaiga e aveese le gasegase o le lepela ona e lē tatau ona toe vaaia i lenei vaitaimi.
O le faafitauli o iai nei, e faatino lava faainumaga o fualaau i tausaga uma, ae e lē o inu fualaau a nisi o sui o aiga ma ua mafua ai le toe vaaia o le aafia o sui nei e lei toe inu lava ni fualaau ma vai mo le fanau.
O le mafuaaga foi lea o le tulai mai pea o lenei gasegase o le lē usitaia o lenei taumafaiga.
Ua sui ai loa le faiga o faainuga vai ma fualaau i lenei tausaga, ua lē toe agai sa’o atu sui o le matagaluega i aiga ma tuu ai fualaau, ae ua nonofo ai lava i maota filifilia o afioaga uma ae agai ane i ai le atunuu, ma o le lisi o le aiga atoa ua mafai ona ave i sui o le Matagaluega ma vaavaai ai loa i latou e lē o inuina fualaau faato’ā agai sa’o loa i ai mo le faainuina o nei fualaau.
E nonofo ai lava foi seia inu fualaau nei ma faamautu ai ua inu tagata uma. E vali uliuli foi le lima matua e pei ona vaaia i faiga palota, e mautinoa ai le tagata ua inu fualaau ma le tagata e lei faia lea tulaga.
O le agai lea a leMatagaluega e manatu o le a matuā fufulu mamā ese ai le gasegase o le mūmū tutupa i totonu o le atunuu.
