Ua tāpā e nisi o matai o le afioaga o Siumu ni fautuaga mai i nisi o faalapotopotoga i totonu o le atunuu i le taumafai lea e fai se tagi faasaga i le latou loia, le afioga Leuluaialii Olinda Woodroffe.
Ua faamaonia mai e ni faalapotopotoga se lua e lē o iai se manaoga e faailoa faalauaitele o la igoa, e moni ua oo atu ni sui o le afioaga mo se fesoasoani.
O le faamatalaga ua avatu, e fia iloa pe mafai ona o latou ave le tamaitai loia i le faamasinoga ona ua lē tau lau o le faamoemome e pei ona ua tele tausaga o saili ai le toe faafoi mai o fanua ua manatu Siumu o fanua o le afioaga na ave ese i le faaiuga o le senituri e 18 ma le amataga o le senituri e 19.
O le mau a le afioaga e lei aloia faaletulafono nei feutagaiga na aveese ai fanua o le afioaga.
O le tausaga e 2007 lea na faia ai le faaiuga a le Faamasinoga Maualuga ma manumalo ai le Ofisa o le Loia Sili a Samoa, lea na ave i le faamasinoga e le afioaga, e fai ai ma sui o le Malo.
O le faaiuga a le Faamasinoga ua faamautu ai e amanaia ma aloaia feutagaiga na fai ma mafua ai le lē toe umia e Siumu o fanua ia e finau ai le toe faafoi ane e le Malo. Na toe apili pe talosaga foi lea iuga ma le faamatalaga a le Faamasinoga o Talosaga, e aloaia lava le iuga na faia ma faamatuu ese ai fanua ia ua finauina e Siumu. O lea la ua agai nisi o le afioaga e taumafai e ave le loia na tulai mo i latou i lenei mataupu, ma le latou mau e matuā telē le tupe ua alu i le tamaitai loia ae o lea e lei faamanuiaina le taumafaiga. Na tapa se tasi o Faalapotopotoga na sulufai i ai alii ma faipule pe o le ā se fautuaga ua ave i le afioaga, talu ai e lē talanoa se isi ma se iuga o se faamasinoga ma e leiloa foi auga o mea nei o iloiloga.
O le tali a lea faalapotopotoga e foliga mai ua iai ni talanoaga a le tamaitai loia ma le nuu ma ua manatu ai le afioaga e tatau lava ona manumalo.
O le fautuaga a le isi faalapotopotoga na ave i le nuu, o le Faamasinoga lava le nofoaga talafeagai e ave i ai le latou faaseā ae ia o latou talia foi la se faaiuga e aumai e le Faamasinoga e faatatau i lo latou lē malilie i le latou loia.
O lea foi ua maua ripoti e le tatou ofisa ua mae‘a ona faaali le finagalo o nisi o le nuu i le tamaitai loia, ma ua mae‘a ona tuu atu i ai e le Afioga Leuluaialii le avanoa e sailiili ai le nuu i se laasaga faapea pe afai o le manatu lea o le afioaga.
E lei iai la se tagi ua faauluina i le taimi nei na ona faaali lava o le lē malilie o le afioaga ma o loo tuufesili solo lava pe mafai ona fai se tagi pe leai, ae e lei maua foi se avanoa e talanoa ai ma le tamaitai loia ona na mae‘a loa iloiloga sa faia i Mulinuu toe foi i Niu Sila le tamaitai loia.
