Ua tuuina mai e le malo Samoa le faatagaga mo tagata Samoa uma o loo maua galuega e faigaluega ai i isi atunuu aemaise lava i Ausetalia ma Niu Sila, e mafai ai ona latou faamaonia nonogatupe (loan guarantors) mo o latou aiga o loo i Samoa, ma o na foi nonogatupe o le a itiiti pe maulalo le tului e faia ai, e pei ona iai le fuafuaga a le Faalapotopotoga o Fale a le atunuu, le Samoa Housing Corporation.
O lenei faatagaga ua faia ina ia mafai ona toe fausia ai fale o o latou aiga na faaleagaina i le afā o Eveni lea na afaina ai le atu Samoa i le masina o Tesema i le tausaga talu ai, 2012. O se faasilasilaga lea na tuuina ane e le Minisita o Tupe, le afioga ia Faumuina Tiatia Liuga.
E $26 miliona tala se tupe na tuuina atu e le Faletupe Tutotonu mo le faatupeina o mean a faaleagaina i le afā o Eveni ina ua faatoa mavae lava le afā, faatasi ai ma le $5 miliona tala sa faatulaga atu mo le Faalapotopotoga o Fale o Samoa mo ana nonogatupe, ma le isi faaatoaga mai le Faletupe o Atinae o Samoa, le Development Bank of Samoa.
O le seleni mo le Faletupe o Atinae, sa faatulaga patino lava mo le fesoasoani atu i le vaega o pisinisi sa aafia ma afaina i le afā. O inā na faatulaga mai ai le seleni e $10 miliona tala sa tuuina atu mo le toe faaleleia o mea na faaleagaina o le Faletalimalo o Aggie Greys Hotel i Vaisigano.
Saunoa Faumuina, “O lenei seleni na tuuina atu atoa mo le Faletalimalo a Aggie ina ia vave ona toe faalelei ma lē lusi ai galuega a le aufaigaluega. Sa silasila le malo i le tulaga e ono lusi uma ai galuega a le tusa ma le 400 le aufaigaluega pe afai ae tapuni le faletalimalo.”
Aemaise o lenei lava faletalimalo, ua avea lava ma mataaga e sili ona iloga ai Samoa i le vaavaai mai a tagata maimoa tafafao, ma e moomia ai lava ona matuā toe faaleleia lenei tautua ina ia atili faamalosia ai pea lenei alaga‘oa o turisi i totonu o le atunuu, aemaise foi le fesoasoani mo tupe maua mo le tamaoaiga a le malo.
E $5 miliona tala sa muai faatulaga mo le Faalapotopotoga o Fale, ma ua uma ona tufatufa atu lea seleni e ala i nonogatupe. Peitai o se tala fiafia ua faailoa mai, ona ua toe faaopoopo le isi $7.5 miliona tala mo lea lava polokalame a le Faalapotopotoga o Fale mo lenei tausaga faaletupe, ina ia atili faaauau ai pea le faia o nonogatupe i ni tului maulalo, mo aiga na matuā faaleagaina o latou maota ma meatotino i le afā.
O lenei seleni ua tuuina atu mo le toe fausia o fale, o se vaega o le seleni e $64 miliona tala ua faatulaga mo le Polokalame toe faaleleia o mea na faatama‘ia i le Afā o Eveni (Cyclone Evan Post Recovery Program).
(Se vaevaega lenei o le seleni)
Tupe Faaalu i Mea na Leaga i le Afā o Eveni
Samoa Water Authority $4.00 million
Ministry of Women $1.00 million
Samoa Housing $7.50 million
Ministry of Environment $3.00 million
Ministry of Agriculture $5.66 million
Land Transportation $4.52 million
EPC $8.68 million
Ministry of Education $9.46 million
National Health $7.97 million
Samoa Tourism $7.57 million
Samoa Ports $4.00 million
TOTAL $64.02 million
