Toe faaopoopo moliaga o faifeau EFKS

O le vaiaso fou lea ua fuafua e toe amatalia aloaia ai galuega tau i le Faamasinoga, talu ona malolo mai i aso malolo e pei ona ona masani ai i tausaga uma, o le Kirisimasi ma le Tausaga Fou. O le faaiuga o le masina lenei, lea ua fuafua e toe valaau ai i le faamasinoga Faaitumalo i Mulinuu faifeau Ekalesia Faapotopotoga Kerisiano Samoa – EFKS e toaiva lea na valaau muamua ia Novema o le 2018, e tali i o latou moliaga e pei ona tuua’ia i le tetee atu lea i le totogi o latou lafoga.

E faapena foi i isi faifeau e to’a sefulu 10, lea na valaau mulimuli ane, i le masina o Tesema 2018, i tuua’iga lava e tasi, lea na aofia ai ma le sui taitaifono o le Ekalesia, Tunumoso Iosia ma isi faifeau Toeaina.

Peitai ua faaalia faalauaitele e le Minisita o Tupe Maua i le atunuu, Tialavea Hunt, e lē na o le pau ai lea o moliaga o loo tuua’ia ai faifeau EFKS. “E iai isi moliaga faaopoopo, ma e fesootai lava i le mea e tasi o le le totogia o lafoga agai i le malo.”

O loo auaua’i ona valaauina faifeau i luma o le faamasinoga, e tali io latou moliaga. E lua moliaga o loo molia ai mo le taimi nei.

O le moliaga muamua o le musu lea e totogi lafoga mai i tupe maua mai i latou tupe maua poo alofa, ma le moliaga lona lua, o le mumusu lea e lesitala o latou suafa mo le faamoemoe o le aveese mai o latou tupe maua o lafoga e fua e pei ona fuafuaina.

Na fesiligia le loia a le Ekalesia EFKS poo toafia ni faifeau ua faamaonia e leo totogi lafoga, peitai na faaalia e le alii loia, e silia i le toaselau le aofai o faifeau o loo i le lisi, ua pasi atu e le matagaluega o tupe maua, “ma o faifeau uma ia o loo i le lisi, o le a tulai i luma i le faamasinoga.”

“E lē o faifeau uma, pei ona silafia o loo i ai se faitau aofai itiiti o faifeau EFKS, o loo totogi lava a latou lafoga i le malo, mai lava i le taimi na tofia ai e galulue i latou aulotu.”

Peitai, e iai lava se vaega tagata lotu o aulotu lo latou lagolagoina o latou faifeau e faatino pe usitaia le mea o loo faiatu ai le malo e totogi a latou lafoga, ae o le mea o loo tupu, o loo faaaloalo ma usitaia e faifeau, le latou vaai i toeaina aemaise o le usitaia o le finagalo o le fonotele a le Ekalesia o le tetee atu lea i le totogi o lafoga e pei ona faataatia mai ele malo.

E pei la ona faalia e se tasi o sui o se tasi o aulotu i le talafatai o Apia, le talosaga a le latou faifeau i le aulotu ina ia auai atu e tapuai le valaauina o ia e tulai i le faamasinoga. Na faaalia e le sui o le aulotu, na manino lava le faamalamalamaga a le aulotu na ave i le faifeau.

“Na matou faiatu ua malilie le aulotu e aveese lau lafoga mai i lou alofa e faamalie ai le tulafono, peitai na e teena, lea la ua e toe talosaga mai, matou te faiatu, matou te faamalie atu, matou te le auai, matou te tumau pea, ona matou fautuaina le aveese o lau lafoga, e pei ona pasia e le malo.”

Saunoa le sui o le aulotu, (o taofia lona suafa mo le nofo filemu) e oo mai i le taimi nei e lē suia le finagalo o le latou faifeau e aveese pe totogi lana lafoga.

O faifeau e to’a 19 ua maea ona tutulai i luma o le faamasinoga e aofia ai, le taitaifono o le Ekalesia, Tautiaga Senara, sui taitaifono Tunumoso Iosia, Faauuga Matautia, Faraimo Tiitii, Fili Matalavea, Fuaao Fuimaono, Iese Uele, Pita Toleafoa, Seilala Luamanuvae, Siaosi Sasulu, Taise Ioapo, Amosa Reupena, Faasalafa Vitaoa, Ioane Petaia, Lavilavi Soloi, Petaia Leavai, Poasa Toiaivao, Semikueva Faatoafe, ma Tavita Anesone.

O le aso 5 o Fepuari lea ua tolopo iai e toe valaau ai i luma o le faamasinoga i latou muamua ia ua samania e le faamasinoga, ma o le a tuuina atu i luma o le faamasinoga latou tali tetee pe tali ioe i moliaga o loo tuua’ia ai.