O le naunau ma le filigā pea ina ia faateleina ma faafaigofieina galuega mo le mamalu o le atunuu ma tagata lautele, o le tasi lea matua tauave, ma se moemitiga a le kamupani a le Pasifika Finance i Manurewa i Aukilani i Saute.
O se auaunaga ua faamalieina ai le galala ma manaoga o le toatele i le tele o manaoga tau seleni nonō, aemaise ai le tulaga o le sailia o mokesi, ae faapea foi le taugofie ma le faamāmā avega i inisiua ma faaputuga tupe mo le luamani ma le soifua manuia.
Ua laasia nei e le Pasifika Finance se isi matatia fou o le ofoina atu lea i tagata lautele aemaise lava o tagata Samoa, o se polokalame e leai se totogi mo soo se tasi lava ua aulia le matua o le soifua i le 55 tausaga agai i le 70 tausaga.
O lea auaunaga ua faatinoina nei ma ua avanoa ai foi mo soo se tasi lava e fia maua lea faamanuiaga.
O le faiga paaga ma se tasi o kamupani inisiua tele i Niu Sila ma le lalolagi atoa, ua mafai ai ona ofi atu ai ma tagata Samoa i totonu o lea faamanuiaga sa lilo. E lē gata i lea a o le faatauanau a le pulega ma faatonusili o le Pasefika Finanace, ua mafua ai ona faamatuu ane lenei auaunaga tāua tele.
Ua toatele ua lolofi atu nei ma tofo, ma lesitalaina i totonu o lenei polokalame aogā, ona e leai ma se tupe e totogia.
O le polokalame ua mae‘a lava ona sainia le maliliega ma i latou e faatupeina ma totogia tupe mo lea fuafuaga, ma o le mafuaaga tonu lea ua saoloto ai tagata e leai ma se sene e totogia.
O le polokalame ua faaigoaina, o le Funeral Plan poo se vaega tupe ua faaagaga mo taimi o mafatiaga poo le maliu. E tusa ma le $15,000 ua faataatia ese mo le tagata e toatasi e maliu a o lesitala ai i totonu o lea polokalame.
O lea vaega tupe o le a tuuina i soo se tasi o le a malilie i ai le toeaina poo le loomatua, e totogi i ai auā le faamoemoe i le taimi o le maliu ma peau faamavae.
O soo se tasi lava ua aulia le 55 tausaga o le a mafai ona agavaa i lea polokalame, ae aunoa lava ma se tupe e totogia. O le matua e faagata mai ai le aogā o le polokalame o le 70 tausaga.
E mafai lava ona inisiua a o lei aulia le 70 tausaga, ma e ao foi ona filifili tatau se tagata e faamaoni ma tausia lelei le feagaiga, mo le totogi i ai o le vaega tupe, pe afai ae maliu se isi ma faamuta ai le mafutaga.
E lē lua nisi kamupani o loo iai se auaunaga faapea i le taimi nei. E ui i lea ae iai foi ona vaega e eseese ai ma le polokalame lea ua ofoina e le Pasifika Finance. Saunoa se tasi o faatonusili o le kamupani, le afioga ia Tofilau Esther Lakisa e faapea, o le naunautaiga lava lea o loo iai, ina ia sailia uma ni auala e faaoo atu ai le tautua i tagata Samoa, aemaise lava o soo se tasi o loo manaomia.
O loo iai foi nisi fuafuaga alualu mamao a le kamupani ua mae‘a ona faataatia mo le tautuaina o Samoa ma le Pasefika mo le lumanai.
Ua ausia foi e le Pasifika Finance le tasi o tautua e ala i le fale maliu o loo i Manukau i le taimi nei. O le a tele foi sona faalauiloaina o lea tautua mo le mamalu o le atunuu.
O loo naunau le kamupani ina ia tasi le nofoaga e afea e le atunuu, ae maua uma ai auaunaga eseese mo manaoga faapitoa ma soo se ituaiga manaoga moomia.
O le kamupani a le Pasifika Finance, e toatolu faatonusili o loo faatautaia lea auaunaga. O le susuga i le alii loia, Chris Jackson, Darren Jones, ma le afioga ia Tofilau Esther Lakisa.
