O le taeao ananafi na taofia uma ai e leoleo femalagaaiga a taavale amata mai i le magafā i Matautu-tai i Apia agai atu i le afioaga o Moataa. O le isi poloka na faia i le afioaga o Laulii i le agai mai ai i le taulaga. Na mafua lea gaioiga ona ua faifai tetele le feeseeseaiga ua tolu vaiaso o tulai mai i le va o tupulaga talavou o afioaga e lua.
O le faamatalaga a Leoleo, o se misa i le va o tama na matamata i taaloga lakapi i le va o le Manu Samoa ma le ‘au a Italia na iu lava ina fai mai i luga o le alatele i le Apia Park, ma o le Aso Toonai ua tea atu na toe tulai mai ai foi ia feeseeseaiga, ma o faleoloa ma aiga nonofo faafesagai ma le Malae Tutuu na molimau i le tau‘ai o o latou fale ma taavale na tutū ai i lea nofoaga ona o misa nei a le tupulaga.
E toaono nisi na faapea ona ave i le falemai ona o nei tau‘aiga maa. O le taeao la ananafi na tau‘ai ai e nisi o le tupulaga talavou a Moataa le pasi o loo agai mai ai tamaiti aoga ma tagata faigaluega o le afioaga o Laulii i le taeao, ma na aafia ai ma le taavale a se tasi o faafeagaiga o le afioaga o Laulii. O le tolu ai lenei o vaiaso ae e lei iloa e le toatele o matai o le afioaga o Moataa sea faalavelave, ma na ta‘ua le taumafai o le afioaga o Laulii e agai ane e faaauau le vevesi lenei ina ua logotala i le tau‘aiga o le pasi ma le taavale a le faifeau.
Peitai, o le faautaga loloto i le mamalu o alii ma faipule o le afioaga na agai mai ai loa e feiloai ma le pulega a alii ma faipule o le afioaga o Moataa ina ia saili se filemu a o lei oo ina lē taofiofia lenei faafitauli. O le matagaluega o leoleo na iai foi i le feiloaiga lea i le aso ananafi ma o se faaleleiga na faatautaia ma faia ai ma le iuga o le tuu atu pea le mataupu i leoleo e faatatau lea i soligatulafono e tulai mai ai i feeseeseaiga a le tupulaga ae o le faaleleiga i le va o tupulaga o le a faatino i le vaiaso fou.
O le saunoaga a Fuamatu Fuamatu o le fofoga lea o Laulii, ua omai lava lo latou nuu i le agaga maualalo ona o le lē fia oo i nisi tuga le gasegase ua tulai mai i le va o tupulaga nei.
O le mau a le afioga Asi Semisi Blakelock, o le gasegase lenei o lea faatoa manino i ai le toatele o tamā o le nuu o Moataa ina ua oo atu le afioaga o Laulii auā e tutupu uma i le Apia Park ae lei iai se upu ua oo atu i matai o le afioaga. Ua saunoa foi Asi ua tuu atu lava i Leoleo e fai le latou galuega ia i latou na faia nei uiga lē migao.
“O le Vaimauga i aso ia sa fono faatasi, ae ua avea le agai lava o nuu latou e faatino a latou atinae ua lē malamalama ai le tupulaga i fesootaiga nei a afioaga, ae ua tulai mai nei lenei faafitauli, atonu o se auala foi e toe faamausali ai le va o le Vaimauga ma faafealofani ana fanau auā e fai e tamaiti ae faatasina ai pulega mamalu a nuu”.
Ta‘ua e Asi o lea ua tasi afioaga e lua i le feiloaiga i le vaiaso fou ma o iina foi o le a taulai i ai le galuega toe fuata‘i ma le faufautua a matai o Moataa.
