O futia ma faaletonu sa tulai mai i le va o le faipule o Satupaitea ma nisi o matai o lona nuu o Vaegā, ua toe auli faamafolafola ma ua toe tasi nei le faiganuu. Faaalia e se matai o le itumalo sa iai i le faaleleiga na faia i le Aso Toonai, aso muamua o Aukuso 2009, o se vaaiga matagofie sa iai i le sauniga lotu sa faia i le malumalu o le Ekalesia Metotisi i Vaegā, aua sa faatasi uma ai le nuu i ona vaega eseese, faapea le fanau ma tupulaga talavou o le afioaga. O eseesega sa aafia ai le va o le tofa Asiata Saleimoa Vaai ma nisi o matai o le nuu na mafua ai ona va le fogavaa ma lua faiganuu. Na maua se feiloaiga ma Asiata Saleimoa i le telefoni, ma ia faamaonia ai ua toe lelei le nuu, ae le faapea sa faatea o ia e pei ona lipotia e nisi o nusipepa ma leitio. “E leai e le se faaaega o au ma isi matai, o le leleiga lea sa fai, ma ua toe tasi le faiganuu”, na saunoa mai ai Asiata.
O le faateaina o nisi o matai ma aiga o le afioaga na mafua ai ona eseese lagona o le nuu ma se lagona o le tofa Asiata Saleimoa. O matai ia sa latou eseese e alaala i Ausetalia peitai ua le faatalia i ai se finagalo o le nuu, ae ua manatu alii ma faipule o loo alaala ma nonofo i le afioaga, ua oo mai le taimi ua tatau ai ona toe fuifui faatasi lupe sa vao eseese ona o futia ma ni faaletonu ua tea. O se itu lelei mo tapenaga o le palota tele o le 2011, ae na faaalia se finagalo o le sui faipule o Satupaitea i lea tulaga, ma ia taua ai afai lava o se mea e lelei ai le nuu, o le itu sili lea ma taua ia te ia. O le maea o le sauniga lotu o le faaleleiga na alo ai loa le sui faipule ma nisi o lona aiga ma le nuu i faaaloaloga faaleaganuu ua masani ai Samoa i aso faapea, e le gata o palapala a malo, ae o tupe ma Ie o le Malo na tatala aua pelega o le ekalesia a le afioaga i le susu a le faafeagaiga taulagi ma le faletua, ae tainane le nofo a Sa‘o o le afioaga ma le maave eseese sa auai.
Faaalia e Asiata Saleimoa Vaai, na matua tele faaaloaloga aemaise o taumafa ma o loo loma nei se aso e feiloai ai ma le itumalo. “Ioe o le isi vaega lena o loo totoe o le faamoemoe, ae e lei iloa se aso tonu e feiloai ai ma tulatoa o tupu ma ee o le Itumalo o Satupaitea”, na saunoa ai le faipule. Ua lua paeaiga a le palemene o Samoa o loo filifilia pea le tofa Asiata e lona itumalo e fai ma o latou sui i upufai o le Malo ma le atunuu. O ia o se tasi o toa magumagu o le Palemene ona o lona finauina o nisi o vaega taua o le Faavae, e pei ona loma se faamasinoga ma le Fofoga Fetalai o le Palemene o le a fesiligia ai ni vaega o tulafono tumau poo standing orders.
