O le tai lima tausaga ma le ono masina na faasalaina ai e le Faamasinoga Maualuga alii e toafā o le nuu o Leauvaa ona o le moliaga o le fasioti tagata paivalea o Sola Ati Nepa, Tuugafa Tauti, Tuugalilo Onosai Filipo, ma Ioane Mamea, i le tausaga ua mavae, ua faaitiitia nei i le na o le 4 tausaga i le falepuipui.
O le faaiuga lea a le Faamasinoga o Talosaga Apili (court of appeal) ua talia ai le talosaga a nei alii e toafā e ala i le latou loia, le afioga Leuluaialii Tasi Malifa, na toe fesiligia ai le faaiuga a le alii faamasino sinia o le Faamasinoga Maualuga o Vui Clarence Nelson.
Sa toe apiliina foi e le loia a nei alii le faaiuga a le faamasinoga ina ua lē amanaia le faato‘ā tulai o i latou i ni moliaga faasolitulafono aemaise o itu lelei sa folasia mo i latou.
O le tasi itu sa finauina ai le faaiuga ona ua manino i molimau a leoleo o lē na aafia i le faalavelave ua maliu na ia amataina le vevesi. Peitai o lea vaega o le apili e lei taliaina seia vaganā le faasalaga ua talia ma faaitiitia ai le faasalaga faafalepuipui.
Sa tatalaina uma i latou e toafā i tua mai le falepuipui i ni aiaiga e faatali ai le taunuuga o le latou apili. Peitai e tolaulau le faaiuga a le Faamasinoga o Talosaga Apili e lei auai i latou.
Ua maua e le tusitala se faamaoniga mai le ofisa o leoleo na ta‘ua ai ua toe auina atu i le falepuipui i Tafaigata Sola Ati Nepa, Tuugafa Tauti, Tuugalilo Onosai Filipo, ma Ioane Mamea, e tuli o latou faasalaga. I se toe tepa i taualumaga a le faamasinoga i le mafuaaga o lenei mataupu o loo faamatalaina ai e faapea, na mafua ona tupu le feteenaiga ma faaoolima ai i latou e toafā i le alii o Akuino Lealali poo Akuino Wright, ona o le taunuuga o se faamasinoga i le suafa Sola sa faia i le Faamasinoga o Fanua ma Suafa.
Na toatamai ai lē ua maliu ma alu loa ma le sapelu i le fale o Sola Ati, lea na muamua ai ona ia faafetaui Sola ma fai ai loa tauiviga i le sapelu seia oo ina palalasi i lalo.
Na fesosofi atu loa ma le isi toatolu ma faaopoopo atu i le faatinoga o le faalavelave, ma oso ane ai se tasi o tamaitai o le nuu e tulata lona fale i le mea na tupu ai le faalavelave ma taofi.
Na ave lē na manu‘a i le falemai e le toalua o lea tamaitai, ae lei atoa se aso na iai i le falemai ae maliu.
O le faato‘ā molia o i latou na avea ma itu lelei uma na laga e le latou loia sa faatāua e le faamasinoga, aemaise o le Ifoga na faatāua foi ua toe mafai ona teuteu ai le va o aiga o i latou e toafā na molia ma le aiga o lē na maliu.
Na oo atu foi se matai o le aiga o lē na maliu i le faamasinoga i le aso na lau ai le iuga ma faailoa atu lea tulaga ma o se fiafiaga lea o le alii faamasino.
Peitai na faamalamalama ane e le alii faamasino o Vui se fautuaga mai le Faamasinoga o Talosaga Apili.
O le fautuaga lea ina ia loloto le silasila a le faamasinoga, i le faatinoga o le Ifoga ina ia lē avea ma mafuaaga o le māmā o se faasalaga pe afai e matuia le faalavelave ma le solitulafono na tupu.
O le fautuaga foi lea o loo faapea mai e le tatau ona faatauina le amiotonu a le faamasinoga.
E valu tausaga na amata ai le fua o le faasalaga, ae na toesea le lua tausaga ma masina e ono ona o itu lelei uma mo i latou na molia.
Ua totoe ai le lima tausaga ma le isi ono masina ua nofosala ai i le falepuipui i Tafaigata.
