Tama ia Sialaoa Sefo tulaga muamua i le tauvaga a tama o le tausaga Disco Daddy

Tama ia Sialaoa Sefo tulaga muamua i le tauvaga a tama o le tausaga Disco Daddy

O le tama ia Sialaoa Sefo ua 74 tausaga le matua o lona soifua, ua toe suipi foi i le tauvaga a tama o le tausaga i luga o le polokalame a le leitio Samoa. Ua faalua ai lea ona siamupini lenei tama i tauvaga a le leitio Samoa e pei ona manumalo ai foi i le tauvaga o le tausaga ua mavae.

O le tausaga nei na faaautu le polokalame i le siva Disco poo le tauvaga ua faaigoaina o le Disco Daddy, ma e pule lava le tamā i le pese e fai ai lana siva disco ae 30 sekone le umi, e pue la e le tamā lana video ona tuu lea i luga o le facebook a le Radio Samoa, o le tamā lava e tele ana LIKES o le tamā foi lea e manumalo.

O le faamoemoe maualuga o lenei polokalame ia toe fafagu a’e ai le soifuaga fiafia o tamā sa iai i aso ua mavae a’o talavou le olaga. E tolu vaiaso na faagasolo ai lenei faamoemoe, ma sa vaaia ai le pulunaunau atu o tamā matutua o tamā laiti aemaise foi o susuga i faafeagaiga e faatāua ma lagolago i lea faamoemoe.

O le aso mulimuli o Aokuso 31 na tapunia ai LIKES mo tamā sa tauva, ae i totonu o lea 3 vaiaso na maitauina ai le lagolago o tamā i luga o le polokalame lea e 30 tamā sa auai, ma o se tauvaga na faaosofia ai lagona fiafia o aiga, o uo ma ē masani e lagolago o latou sui, auā ua maimoa ma silasila i ata video taitasi, e ese foi le talenia o tamā, ma le mālie o taga o a latou siva.

Piriti Misili ma lona alo manumalo faailoga lona lua

Piriti Misili ma lona alo manumalo faailoga lona lua

Ma o le ata vaaia foi lea o le lagolago o tina ma le fanau i le tapenaina lea o laei siva ma teuga a le toeaina aemaise o musika sa faaaogāina. I le 30 o tagata tauva sa auai, sa faamanuiaina uma lava tamā i faailoga sa tauaaoina e nisi o kamupani aemaise o le lagolago a le Radio Samoa.

O le tulaga muamua o le tauvaga, o le pepa malaga i le alu i Samoa ma le toe foi mai, ma o le kamupani a le HelloWorld sa latou lagolagoina lea faailoga, lea sa manumalo ai le tamā matua ia Sialoa Sefo. Na faailoa le lagona o lenei tamā e tasi lava le mafuaaga e auai atu ai i polokalame nei, o le lagolago lava i polokalame a le Radio Samoa, auā o ia e leai sona lagona e fia manumalo pau lava vaega e sili ona tāua mo ia, o le maua ai lea o le fiafia o latou tagata matutua ma le ata. E leai sona lagona o ia e manumalo, ae na faate’ia o ia i le fai atu o lana fanau ma nisi o lona aiga o ia e manumalo i le tauvaga. Lea ua maua lana pepa malaga i le alu i Samoa, ae o ia e le o ta’ua sana alu i Samoa. Ua iai lona lagona e talosagaina le kamupani o loo lagolagoina lenei faailoga pe mafai ona aumai le tupe ma ia, a lē o lea ua saili loa se tasi o lona aiga e malaga i Samoa e ave le ticket e faaaogā ai ae aumai le tupe ma ia.

O le faailoga lona lua o le moega o loo lagolagoina e le kamupani a le Furniture NZ Ltd, sa manumalo ai le susuga ia Periti Misili. O le lagona fiafia o lea tamā ma lona loto faafetai i le polokalame a le Radio Samoa, ona o lenei polokalame ua toe fafagu mai ai le tele o taleni o loo nonofo ma tamā, e lē o iai foi se lagona fia manumalo ia te ia, ae o le naunautaiga lava o lona loto o le lagolago ma le auai i polokalame a le Radio Samoa.

Laupua Pili tasi o tama manumalo i le tauvaga

Laupua Pili tasi o tama manumalo i le tauvaga

I le tāua foi o le faamoemoe, ua mafai ai ona vaaia le malosi o le lagolago o le tina o le aiga ma le fanau, auā o ia sa faigaluega ae mānava atu i le fale ae talanoa atu le tina ia te ia e alu atu loa e pue sana video e alu i le tauvaga, ma sa ia talia le tala a le tina ma le fanau.

Pau le vaega na faatali iai le tina o le tali atu a ia pe alu i le tauvaga, ae ina ua ia ioe atu iai, sa saili ai loa le tina e faatau teuga ma galulue le fanau e fai le musika auā le faataunuuina o le faamoemoe. O le aso lava na amata alu ai le faasalalauga o le tauvaga o le aso foi lea na pue ai lana video ae tuu i luga. O le galulue faatasi o mātua ma fanau o le faigofie lea ona faataunuu le manaoga.

Faailoga:

3rd Afa Savea – TV (lagolagoina e le kamupani o le Konka)

4th Sevelu – Tattoo & mitiafu Walking Samoans (lagolagoina e le Humble Beginning Tatau ma le Radio Samoa)

5th Togipau Tuato – Tattoo & mitiafu Walking Samoans (lagolagoina e le Humble Beginning Tatau ma le Radio Samoa)

6th Lape Talopau – Tattoo & mitiafu Walking Samoans (lagolagoina e le Humble Beginning Tatau ma le Radio Samoa)

7th Anzac Mena – Hamper (lagolagoina e le Radio Samoa)

8th Laupua Pili – Hamper (lagolagoina e le Radio Samoa).

O nisi o faailoga na fesoasoani mai ai le fale’aiga a le Talimanao e ala lea i ticket e maua ai le taumafataga a le tamā ma e sefulu pepa sa tauaaoina e le faletua ia Faga.