“O se tasi o fatu ua matou totōina ma faatāua i le tagai mamao a lenei aoga ina ia tapueina atili le soifua a‘oa‘oina o tupulaga talavou, aemaise ia avea lea ma alavaa mo le faafaigofie ona maua ni a latou galuega lelei ma tomai aogā.
O le faafouina o nofoaga o loo faatino ai nei a‘oa‘oga o se tasi o laasaga tāua mo le faamautuina o fuafuaga silasila mamao a lenei auaunaga”.
O nisi ia o vaega o le saunoaga a le faauluuluga (CEO) o le New Zealand Management Academies (NZMA) le susuga ia Tim Cullinane, ina ua ia faafeiloai le Pulenuu o Aukilani, Susuga Len Brown, o se tasi o malo faaaloalogia i le tatalaina faapitoa o nofoaga fou mo a‘oa‘oga a le NZMA i Otahuhu. O lea faamoemoe sa faatinoina i le Aso Tofi, 8 o Novema.
Na matuā faatumulia lea aso e le gata i ē o loo aotauina ai i lenei aoga, aemaise foi o malo faaaloalogia sa valaaulia i lea aso. Na amata le faamoemoe i le powhiri matagofie mo le faafeiloaiga sa tapena e le kulupu Kapa Haka a le NZMA.
O a‘oa‘oga ma tomai faapitoa o loo a‘oa‘oina i le NZMA e aofia ai tomai i le amatalia o se pisinisi, galuega faaofisa, auaunaga e faatino i luga o le telefoni (contact centre skills) faapea a‘oa‘oga mo taligamalo ma le gaseseina o taumafa.
O se tasi o tulaga tāua sa faatino i lea aso o le tatalaina lea o le potu fou mo gasesega o taumafa ma le fale‘aiga ua ta‘ua o le ‘Cafe Fusion’. E tele masini mo kuka faaonaponei o loo faaaogāina i totonu o lenei potu poo le fale‘aiga mo tamaiti aoga.
O le saunoaga faaiu o le aso sa matuā oooo i lagona o ē uma na auai, sa saunoa i ai le Susuga Len Brown, “O Aukilani o se tasi o ‘aai o loo unaia malosi le atinaeina o le tamaoaiga o Niu Sila.
Ma o lea e talafeagai ai foi ona tutupu ma taulamua Aukilani i ana matati‘a ma faatufugaga aemaise o galuega atia‘e e pei o le taumafaiga sa alo atu i ai le NZMA, auā lava le faatupulaia pea o le tomai faapitoa ma le a‘oa‘oina, aemaise ina ia faamautinoa o loo maua pea le avanoa e ulufale atu ai i ni galuega talafeagai ia o loo aotauina i a‘oa‘oga faapenei”.