O se fiafiaga tele i le alii fusu lauiloa i lona tulai mai i ona vaitaimi ia Sam Leuii e pei ona lausilafia ai, ina ua ia mauaina le avanoa e galulue ai ma le alii fusu ia Ofisa Vili.
E tusa ai ma faamatalaga e faapea, ua fai si leva e lei toe fusu le alii o Ofisa Vili i le maea fusu, ma o se filifiliga na faia lava e le alii fusu ia Ofisa Vili lona toe fia foi e faaauau ma finau faatama fusu i le maea.
O se filifiliga sa lei faigofie ia Ofisa Vili e tusa ai ma se faatalanoaga. Na ia ta‘ua e tele mea sa faafaigata ai lana filifiliga, e lē gata o ia o se tagata faipisinisi ma pulea se fale koleni ua faaigoaina i le Vili’s Boxing Gym i Manurewa, aemaise o ona tiute faatamā mo lona aiga aemaise lona toalua.
O se taimi umi lava sa tau faamautu ai lona mafaufau i le toe foi i le maea fusu, faapea ina ua mae‘a se faatalanoaga ma lona toalua ma faamatala i ai lona toe fia fusu i le maea, na pei e matuu atu se mamafa sa iai i lona tino, ina ua mautu lona mafaufau, ma ia saili loa poo ai se faiaoga na te koleniina o ia, ma o le auala tonu lea na ia filifilia ai le alii ia Sam Leuii e fesoasoani ia te ia.
O le afiafi la o le Aso Faraile na se‘i mavae atu, na matuā faatumulia ai le nofoaga o le Browns Road Netball Hall i Manurewa i ni fusuaga faapolofesa i lea afiafi, ae taualuga ai faipelega faapolofesa i le paga autū o lea afiafi ia Ofisa Vili ma le alii o Shaun, ma auaufaatasi uma ai alii faamasino e tuu atu le manumalo ia Ofisa Vili.
O se afiafi matagofie tele ina ua a‘e manuia faiva o le alii fusu aemaise pei o le Vili’s Boxing Gym lava na tuufaatasia uma nei taumafaiga o fusuaga ma faipelega faapolofesa, na vaaia le matuā faatumulia uma o le nofoaga i Browns Road Netball Hall i lea po.
Na saunia faapitoa foi vaitaumafa ma le taumafataga faapitoa mo laulau faapitoa o pisinisi ma kamupani.
Na mae‘a ma le manuia faipelega i lea afiafi i le manuia. Se‘i tatou tālia pea nisi faipelega faapolofesa o loo foufou e agai mai mo le alii fusu ia Ofisa Vili i le lumanai, e faafetaia ai foi e tatou tala i taaloga le alii ia Ofisa Vili ina ua a‘e ai ma le manuia ia faiva faatama tane i faipelega, ma ua malie mata e vaai i lea po.
