Ua fai si umi o gagalo atu le aufaipese a le Nato Brothers, ma ua le toe faalogoina foi e le atunuu ma le aufaafofoga ni a latou fatuga fou, peitai ua faateia Samoa i Aoteroa nei i le ogatotonu o le tausaga nei i le toe manu a’e o tama mai le motu i Salafai mai le afioga o Safotu le Nato Brothers o lea ua toe tu laueleele i laufanua o Aukilani e tatala aloia le isi ana fatuga fou lona 11 ua faaigoaina, “E le galo oe lau Samoa.”
O le tausaga 2014 na gata mai ai a latou fatuga i le CD lona 10, ae na faamanino e le susuga ia Ioane Panei o ia lea o le ulumatua o le fanau a Penei ma lona faletua, na mafua ona va le latou taumafaiga o musika ona ua fai si vava mamao o nofoaga o loo nonofo ai ma ona uso laiti ma ona matua.
O ia na manuia ana pepa i le se’i a Samoa ma maua ai le avanoa e aumau ai i Niu Sila nei ao lona aiga o loo nonofo lava i Samoa, e ui lava la i le va i vasa o nofoaga, ae le mafai ona ave esea ai lo latou naunau e fatu fatuga ma lagi pese ma tuufaatasia ai cd ina ia mafai ona faaauauina ai pea le taleni ma le meaalofa ua tuuina e le Atua i totonu o le latou aiga.
O le latou taleni pese, o le meaalofa a le Atua na tuuina i le latou tama e ala lea i le fatuina o pese a le ekalesia ma le taina o pese a le lotu. Aluai, aluai ua amata foi ona aoaoina i latou e le latou tama e ala lea i le usuina o pese ma le fatuina o pese lea o loo oo mai lava i le taimi nei o loo faaauauina pea lea galuega mo le aiga.
O le CD fou ua faaigoaina ‘E le galo oe la’u Samoa’, o le pese na fatuina e le susuga ia Ioane Penei. Na mafua ona tutupu ia lagona, ona o loo faatatau i le olaga o lenei alii talavou a’o mafuta faatasi ai ma ona mātua i Samoa.
O ia e iai taimi e usitai ai i ona mātua, e iai foi taimi e faalogogata ai i ona mātua, peitai e tele foi faafitauli ma faigata o le olaga sa feagai ma ia a’o iai i Samoa i autafa o ona mātua. Ina ua manuia lona olaga ma sau i Niu Sila nei, na ia iloa ai e sili atu le faigata o le olaga o Niu Sila nai lo Samoa, ma ua ia toe lagona ai upu a ona mātua na taumafai ai lona olaga a’o mafuta faatasi ma lona aiga.
O le feau o loo momoliina atu i le pese, o le tele o taimi e vili mai ai aiga i Samoa i aiga i Niu Sila nei e le faigofie Samoa, a’o lea ua sau ia ma nofo ma vaavaai, e faaluaina le lē faigofie o Niu Sila ma atunuu i fafo nai lo Samoa. E aogā mo aiga o loo nonofo i atunuu i fafo, afai o loo alolofa i aiga i Samoa e tatau foi i aiga Samoa ona alolofa mai i aiga i fafo.
E sefuluono fatuga o loo i totonu o le CD fou lenei, ma o le afiaafi o le Aso Toonai o le vaiaso ua mavae lea sa faia ai le latou faafiafiaga tele i le fale faafiafia o le Parataiso i Otara e faalauiloa aloaia ai le latou CD fou lenei.
O le afioga ia Faimalo Allen Stowers ma le kamupani a le Pacific Ezy Money Transfer faapea le Moana Rentals o loo latou lagolagoina le faamoemoe o le aufaipese lenei o le Nato Brothers a’o iai i Aotearoa nei. O le aufaipese a le Nato Brothers o loo malaga mai ai le alii o Nato o loo faaigoaina ai lenei aufaipese faatasi ai ma le latou tina, faapea le alii o Ioane Penei.
