Ua toe galue nei i le auaunaga faatusitala ma faasalalauga le afioga Tuiasau Leota Uelese Petaia o se tasi o tamalii ua loa tausaga o galue i lea matata e pei ona sa amata ona galue i faasalalauga i le televise a Niu Sila i tausaga ua tuanai, a o lei taliu mai i Samoa ma faaauau ai ona tauave ona tiute i galuega i nusipepa ma televise.
O le nusipepa o le Samoa Observer ua toe galue ai nei lea tamalii sa tuli sona faasalaga i le falepuipui, ae na magalo i le palola i le masina na tea nei.
E ui ina sa feagai o ia ma ni tulaga faigata ae ua ia faaalia lona faafetaia o le pulega o le nusipepa ua toe maua ai se avanoa e toe amata ai lona tomai faatusitala ma toe amata lelei sona lumanai i le mavae o ni faaletonu sa fetaiai ma ia.
O le vaitau o le 1980 na galue muamua ai Tuiasau i le Samoa Observer o se faatonu, ae na ia tuua mo nisi fuafuaga seia oo ina filifilia e na te pulea le televise a le Malo, sosoo ai ma le faatuina o lana lava faletelevise lea na toe tapunia i le tuanai o le lua tausaga ona o ni faaletonu tau tupe.
Ua avea nei lea tamalii ma lagolago i le galuega tau faatonu o le nusipepa ma fesoasoani foi i le saunia o tusitusiga e lomia mo le faasalalauina.
