“E lē o mautinoa pe tumau ai pea malaga i Satitoa, pe iai foi se taimi e toe foi mai ai i le uafu i Apia”, o le faamatalaga lea a se tasi o tagata ofisa o le Faalapotopotoga o Vaa. O le Aso Lulu, 15 o Iuni 2011 na toe foi ai i le uafu i Satitoa Aleipata malaga a le MV Lady Naomi i le va o Samoa e lua (Samoa ma Amerika Samoa), ina ua mae‘a malaga togipau a le vaa sa faia mo motu o Tokelau.
O loo fuafua lea itu i le toe faia o nisi malaga togipau a le Lady Naomi mo Tokelau e pei ona faaalia e se isi ofisa sinia o le faalapotopotoga o Vaa a Samoa, o loo feagai ma le tautuaina o malaga i le va o Samoa e lua, faapea malaga i le va o Mulifanua ma Salelologa aemaise o malaga togipau e faaaogā ai vaa o le faalapotopotoga.
O le masina fou e pei ona faailoa mai e ono toe fetuunai ai taimi o malaga a le Lady Naomi lea e faapea o le a tutusa ai taimi e tuua ai e le vaa le uafu i Satitoa, ma le uafu i Fagatogo Amerika Samoa. Peitai e lē o faamautuina poo ā tonu itula o le aso o le a faatino ai lea suiga.
O le taimi nei o loo tuua e le Lady Naomi Satitoa i Aso Lulu i le ta o le 10 i le taeao, ae toe tuua le uafu i Fagatogo i le Aso Tofi i le 9 i le taeao. O loo iai pea atugaluga o nisi o pasese o loo faaaogāina le tautua a le faalapotopotoga o vaa a Samoa i le va o Apia ma Pago Pago ona o le mamao o le uafu ua faaaogā.
O pasese e malaga mai Salafai ma nuu i le itu i Sisifo o Upolu o loo mafatia tele i lea tulaga, aemaise e lē gata ina mamao mo latou ae e iai foi tupe faaopoopo e faaalu mo feoaiga. O le totogi foi o faamomoli mai aiga i Tutuila ua faaopoopo le tau pe a aumai mai le uafu i Satitoa i le ofisa o le faalapotopotoga o vaa i Apia mo le siakiina ona faato‘ā faamatuu ai lea i tagata e ana ia faamomoli.
E lē gata i nisi o tagata malaga o loo feagai ma nisi o to‘a i tapenaga ona o le mamao o le uafu i Satitoa.
O loo iai foi ni molimau ua faaalia ai le faaopoopo o tupe faaalu a le faalapotopotoga o vaa i le tapenaina o vaega uma mo le faaeeina o pasese ma uta a o lei tuua Samoa mo Tutuila, e faapea foi i le toe taliu mai o malaga a le Lady Naomi.
O le taimi nei e na o le tasi lava le malaga o loo faia i le vaiaso i le va o Samoa e lua.
