O le vaiaso lenei o loo faagasolo ai le Teuila i Samoa o se polokalame a le Malo ua silia i le sefulu tausaga o faia pea, i le naunauta’iga e saga faaolaola tu ma aganuu i soo se vaega ae o le sini ia faatosina ai tagata tafafao poo tulisi e malaga tafafao i Samoa.
O le taualuga o le Teuila o le sailia o se tamaitai Samoa lalelei e avea ma ona tausala, ma avea ai ma sui o le atunuu i le tauvaga tele e sailia ai se lalelei o le Pasefika. O se alo ma se tamafanau a Samoa e lauiloa i lona igoa o Cindy o loo avea ma Faatonu o le tauvaga atoa, i le itu i le tapenaina o tamaitai mo le faamoemoe.
O le tausaga ua mavae na filifilia ai foi e avea ma faatonu mo tapenaga a tausala, ae ua toe filifilia foi e le pulega o Tagata Tafafao ma le soa komiti o le Teuila o loo gafa ma le tauvaga Tausala.
O le aso Lulu na te’a nei aso muamua o Setema 2010 na amata ai ona faagasolo tapenaga a tamaitai le pre pageant programme i le a‘oina o le siva amata e agai ai ane ai tamaitai tauva i luma o le fata o le a faia ai le faamoemoe lea o le a lolofi i ai le toatele e fia maimoaina i le po o le Aso Faraile nei (taimi i Samoa).
Sa fesiligia se sui o le komiti o le tauvaga Tausala Samoa pe aisea ua filifilia ai Cindy e tapenaina tamaitai i le itu i siva ma latou gaioiga uma.
O le tali a le sui lea o le komiti, e pikia tele e le pulega le sao o Cindy i lea vaega pe a fua i le tauvaga o le tausaga ua mavae i le matagofie o tapenaga sa iai.
O le faaaliga foi a le sui lea, e lē faapea o Cindy o le faafafine ona faleesea ai lea i se silasila a le komiti auā o se alii e fiafia tele ma faananau i aga ma taga faatamaitai, ma e fiafia foi iai tamaitai auā e pei lava o se teine pe a fai a latou tala, ma faatino le latou polokalame.
O le Aso Faraile na tea nei na faato‘ā taunuu ai i Samoa tausala Samoa mai Niu Sila ma Ausetalia. O le vaiaso nei o loo faasolo ai asiasiga a tausala i vaega eseese e pei o le nofoaga o le au matutua i Mapuifagalele, le falemai o le fanau, ma nisi o asiasiga a o lei oo i le po o le a sailia ai le auro moni i le afi. Le po o le Aso Faraile nei o le a faatino ai le faamoemoe ma iloa ai poo ai o le toaono o tamaitai tauva o le a manumalo.
O tamaitai tauva mai Samoa e aofia ai Lagilualua Ita Fiso, Jolivette Mennime Ete, Saasa’ai Iteli Tiatia, ma Maria Tupou Woo Ching. O le tausala mai Niu Sila o Maree Angelica Wright, ae o le lalelei mai Ausetalia o Sallie M Wulf Peterson. Ua leai se tausala Samoa mai Utah i Amerika e pei ona faalua ona tauva i tauvaga ua tuanai.
