Toe ave faapagota i Niu Sila i moliaga faasolitulafono

O le amataga o le vaiaso nei na aveesea ai ma Samoa i lalo o aiaiga o le tulafono ma maliega faavaomalo se tasi o alii ua 42 tausaga lona matua, ona o ni moliaga faasolitulafono o loo molia ai i Niu Sila. O Fatu Seti o loo tuua‘ia i le solitulafono o le faiaiga fai faamalosi ma se tamaitai 20 tausaga le matua i Niu Sila, ae na ia sola ese ma malaga mai i Samoa lea na ia faia ai ni gaioiga na suia ai lona tusifolau ua iai se isi igoa ae o loo taofia lona alu ese ma Niu sila ona o le solitulafono.

Faaalia i se lipoti na ia laeiina ni ofu e foliga ai o se tamaitai, ma malaga mai ai loa i Samoa, ma ua valu tausaga o sailia e leoleo i Niu Sila, ae na maua faamatalaga ma molimau o loo faigaluega i se pisinisi faletalimalo i Samoa nei. O le tausaga e 2005 na tulai mai ai le solitulafono o loo tuua‘ia ai lea taulealea.

Ua faaalia e le Loia Sili a le Malo le afioga Aumua Ming Leung Wai, O le aso 21 o Tesema o le tausaga na tea nei na oo ai se tusi i le Minisita o Faamasinoga le afioga Fiame Naomi Mataafa, mai le Malo o Niu Sila sa talosagaina ai le faafoi atu o Fatu Seti e tali i ona moliaga. Talu mai lea taimi sa amata loa ona faia feuiuiaiga ma sailia ai lea taulealea seia oo ina maua, ma faia ai loa le faaiuga a le faamasinoga i Samoa nei e faatino tulaga uma mo le aveesea o lea alii ma le atunuu ae toe avatu i Niu Sila mo lona faamasinoga.

O le afioga i le Sui Minisita o faamasinoga o ia foi o le Palemia na ia sainia pepa e faatino ai loa le aveesea o Fatu ma le atunuu e pei ona tuua le atunuu i le Aso Toonai ua mavae ma sa malaga faatasi o ia ma ni leoleo se toalua mai Niu Sila.

O le taamilosaga lakapi o le Ipu o le Lalolagi i le tausaga e 2011, sa avea Fatu ma se tasi e taitai i se ata televise sa aofia ai ma nisi o le autapuai mai Samoa a o lei faia le taaloga a le Manu Samoa ma le aulakapi a Aferika i Saute le Springpoks. Sa i totonu foi o le ausiva a le Pulega o Tagata Tafafao a Samoa, lea na mafai ona malaga ai i Amerika i se vaitaimi ma le ausiva.

E pueina ma toe avatu i Niu Sila na sola ese mai ai a o loma le faamasinoga o lona moliaga o le toso teine, o loo galue i se tasi o pisinisi tau tagata tafafao o se faletalimalo i se tasi o afioaga o le atunuu i Upolu.

I le pepa o faasalalauga mai le ofisa o le Loia Sili a le Malo sa faaalia ai sa malie Fatu i folasaga i luma o le faamasinoga faaitumalo i Mulinuu e faatatau i le mafuaaga o le ave faapagota
e tali ona moliaga.