Ua faamautu mai e se sui o le afioaga o Tanugamanono ua tasi nei lea afioaga e toe apili le faaiuga a le Faamasinoga o Fanua ma Suafa lea na faataga ai le aiga o Faumuina Tutuila Fereti ona toe foi i lo latou fanua ma fale ia na faatulai ese mai ai e Tanugamanono i le tausaga na tea nei.
O le iuga lenei na aumai i le faaiuga o le tausaga na tea nei, ae e oo mai lava i le asō e lei mafai lava ona toe foi le aiga.
Petai ua tele ni faasalalauga ua faia e uiga i lea mataupu ae e lei faaalia lava se taofi o le afioaga o Tanugamanono poo le ā so latou taofi i le iuga a le Faamasinoga ae pe o iai se tofa i le nuu e toe faafoi atu lea aiga i o latou fanua.
Na maua le avanoa e faatalatalanoa ai se tasi o matai o le afioaga ae e lei finagalo lea tamalii e faailoa lona suafa ona o le tasi a le afioaga se‘i mae‘a mataupu tau i le Faamasinoga o loo alo atu i ai, ona faato‘ā faasalalau lea o se manatu lautele o tamalii o lea nuu.
I le faatalatalanoaga la a le nusipepa ma lea tamalii, na ia faaalia ai ua mae‘a ona apili e le nuu le iuga o le Faamasinoga lea e toe foi atu ai lea aiga i o latou eleele ma na saunoa manino lea matai ua tasi le tofa i le tuua o le afioaga, le susuga ia Atoa, o ia foi lea e faalogo uma i ai le nuu, e lē toe taliaina lenei aiga i totonu o laueleele o Tanugamanono e ui i le iuga ua aumai e le Faamasinoga.
O le apili la a le afioaga e faatatau i le iuga o le Faamasinoga na ta‘ua e lea tamā, na valaau i le aso 5 o le masina nei ae ua toe tolopo mo le masina fou. “E tele tagata ua latou talitonu i faamatalaga sese a lea aiga lea na faasalalau mai le polokalame o le 30 Minute ma ua avea ma itu ua mafaufau ai tagata e leaga lo matou nuu.
Ae leai, e tele mea e lē o malamalama i ai tagata i le aiga lea ma o le ala foi lea ua faatea motu ai ma le nuu”, o le saunoaga lea a le matai e lei finagalo e faaalia lona igoa.
E pei ona ta‘ua e lea matai, ua leva ona ave le faaseā a le tina ia Afu Tutuila Fereti lea ua tea ma le nuu, e taofi le galuega a lea aulotu ona ua maualuga tele le fale lea o loo fai ae maulalo lona fale. Ma o lenei mataupu na fai muamua i le Faamasinoga i le va o le aiga Faumui ma le aiga Sa Atoa e uiga i le galuega lenei a le aulotu ma le fanua o loo tu ai le falesa.
Ma o le iuga a le Faamasinoga e toe faaauau le galuega ae o lea foi ua toe tulai mai nei vevesi, ma ua alagatatau loa ona faatulai ese loa nei tagata ma le nuu. Ua lē o toe iai se manatu o le nuu e toe talia lava lenei aiga.
“E laitiiti lava le mafuaaga o le vevesi ma ua tele tuuaiga sese ua faia e le aiga faasaga i le nuu, ae e lē o malamalama le tele o tagata”, o le toe faaopoopo mai lea a lea matai.
Na faamatala e lea matai, o Alafaio le igoa o le taulealea na togia le maa i le fale o lea aiga ona o le la feeseeseaiga ma Sauaga le faiava o le aiga lea. O Sauaga na sau sue le tagata na ia togia le latou fale ae na te lei maua ma o le ala lea na laulauvavale ai ma faaumuumu i luma o le falesa.
Na lagona e nisi o tupulaga le laulauvavale a Sauaga ma o loa tau‘ai le fale o le aiga ma na aafia atu ai ma le galuega a le aulotu lea e sosoo ma le fale o lenei aiga.
O nei tuuaiga uma ua mae‘a ona teena e le aiga ua aafia nei ma e manino foi i le asiasiga a le tatou Ofisa i le fale o lenei aiga e matuā telē lava le aafiaga o le faaleaga o meatotino i totonu ma fafo o le fale ae e faapea foi vaega ua faaleagaina o lenei fanua ua nonofo ai le fanau a Faumuina i le taimi nei.
E ui i lea, o loo faagasolo tagi a le aiga ua aafia faasaga i le faaleagaina o nei meatotino i le mu faapea ai foi mea totino ua ave ese. Ua valaauina nisi o ia mataupu i luma o le Faamasinoga e pei ona amata mai i le vaiaso na tea nei.
O le faamatalaga foi a le matai lenei e faatatau i vevesi ua tulai mai i le va o Tanugamanono ma le aiga o Faumuina Fereti, na faaalia i luma o le Faamasinoga o Fanua ma Suafa ma iloilo ai – o le faaiuga a le faamasinoga, o vevesi ua faamaonia, e lē faamalieina le faamasinoga e tusa ai ma le tulafono o Nuu, e talafeagai lea ona avea ma mafuaaga e faatulai ese ai se aiga mai i se nuu.
O loo manino mafuaaga e mafai ai ona faatulai ese nisi mai i se nuu ae o mafuaaga uma na avatu e le afioaga e lē o aofia ai i aiaiga faaletulafono o faaiuga nei ua fai.
E ui i lea o loo finau lava le afioaga e talafeagai le latou faaiuga ua faia. I lalo o le tulafono o Tanugamanono lea ua lē usitaia le faaiuga a le Faamasinoga o Fanua ma Suafa ma e mafai ona aafia i le tulafono lea afioaga, peitai o lea ua tālia nei le apili ua fai pe o le a tatala ai le avanoa e toe foi le aiga o Faumuina Tutuila Fereti pe o le a faapea ona faia loa le finagalo o le nuu.
Ua tele foi finauga ua lagalagā i luga o le televise ma nusipepa talu mai lea faaiuga ae e ui i nei finauga e leēo mafai lava ona toe foi lea aiga i o latou eleele ma fanua e pei ona faatonuina ai e le Faamasinoga.
