Toe amata malaga tuusao i Hawaii

O le Kamupani Vaalele a le Ea Pasefika (Air Pacific) a Fiti lea ua o latou talia le lui na ave i ai e le Sui Palemia o Samoa, le afioga Misa Telefoni ina ia o latou faatautaia ni faigamalaga mai Fiti, afea Samoa ma alu sao lava i Hawaii.
O faigamalaga tuusao mai Samoa i Hawaii na faamuta lava ina ua le toe malaga le Ave Fua a Samoa le Polenisia i lea atunuu. E silia i le 10 tausaga e le o toe vaaia nei faigamalaga tuusao mai Samoa nei.
O le kamupani o le Ea Niu Sila o loo maua ai le avanoa e afea ai e le faigamalaga mai Niu Sila, afea Tonga ma Samoa ona malaga loa lea i Hawaii poo Amerika foi.
I le taimi na muai laga ai e le Sui Palemia o Samoa lea ala o femalagaaiga i le
amataga o le tausaga na taua e le alii o loo faauluulu i ai le kamupani vaalele o le Ea Pasefika, John Campbell, na faigata ona ioe mai i ai ona o le manatu e le o se auala lea o femalagaaiga e tele se tupe a le kamupani e maua mai ai.
Peitai na ia taua o le maea o a latou sailiiliga aemaise o suesuega i femalagaaiga a le kamupani vaalele a Samoa le Polenisia i tausaga ua mavae i lea atunuu na maua ai e tele lava le pisinisi e maua mai ai aemaise o le toatele o i latou e mafai ona malaga mai foi i Amerika Samoa mo faigamalaga i Hawaii pe a le avanoa femalagaaiga o loo mafai ona maua i le teritori i Sasae.
Faaalia e Campbell ua maualuga le tulaga o le atinae o tagata tafafao maimoa mai fafo ma o se tasi lenei o auaunaga a lana kamupani vaalele o le a fesoasoani ai i atumotu tuaoi o Fiti e tali atu i manaoga o le mamalu femalagaai.
O le Afioga lava i le Sui Palemia, Misa Telefoni na sainilima ma le susuga John Campbell e faamaonia le amataga o nei faigamalaga ua faatautaia nei e le Ea Pasefika.
O le faleaiga o le Paddles i Apia na faatautaia ai lea sainigalima, mulimuli ai i se feiloaiga a le Malo, e ala i le Alii Palemia, Tuilaepa Lupesoliai Sailele Malielegaoi ma le Pulega o le Ea Pasefika, na faia lea i le afiafi na sosoo ai i le Mataaga o Ropati Lui Sitivenisone i Vailima.
O se fiafia tele na valaaulia ai ofisa malaga eseese o Samoa, Niu Sila faapea foi Amerika Samoa aemaise i latou i le atinae o Tagata Tafafao maimoa mai fafo, na faamanatu ai le amataga o lenei faiga faapaaga a le Malo o Samoa ma le Kamupani Vaalele a Fiti.
O le taimi lenei o loo maualuga lava le numera o tagata tafafao maimoa mai tagatanuu o Niu Sila, Ausetalia ma Amerika Samoa ma o le faamoemoe o le Pulega o Tagata Tafafao mai i Samoa nei, ina ia tatala lenei auala o femalagaaiga mo tagata tafafao mai o Amerika o loo faigata feuiaiga e agai mai ai i Samoa nei.
O le agaga maualuga foi lea o le Malo e pei ona taua e nei taitai o Samoa, o le faaopoopo o tautua a kamupani vaalele mo femalagaaiga mai i Samoa aua o se auala sili lea ona moomia i le taumafaiga a Samoa ina ia faaopoopo pea le numera o tagata tafafao mai i Samoa aemaise o se faamama avega tele lea mo le toatele o tagatanuu o Samoa ua tele tausaga o motusia malaga tuusao nei i Hawaii.
O le toatele ua uia lava Niu Sila poo Amerika Samoa foi pe a iai se faamoemoe e malaga i Hawaii.
O le aso Faraile la le aso 11 o Setema lea o le a faamautu ai loa le uluai malaga mai i Samoa nei mo Hawaii e pei ona faatautaia e le Ea Pasefika.