Toe amata le fale faufale a le autalavou a Afega

I le mae‘a ai o ni tausaga o taofi a latou galuega taulima, o le faaiuga o le vaiaso na toe umusa ai se fale fou ua faatautaia ai nei le fale kamuta a le Autalavou a le Ekalesia Faapotopotoga Kerisiano Samoa i le afioaga o Afega.
O se sauniga tele na faatautaia e sami ai le toe tulai mai o lenei atinae. E pei ona faaalia e le faafeagaiga o le ekalesia, Rev. Luapene Nepo.
O le tausaga e 2008 na muai faatūina ai le fale e gaosi ai meaafale a le autalavou peitai o le maota o le galuega lea sa faatautaia ai a latou galuega e pei ona gaosi ai soo se meaafale mai i nofoa, laulau, moega, sefeipu o pusatū ma pusa tioata mo potu moe.
Na faataatia lea atinae ona o le manaoga o le a toe fausia le maota o le galuega ma a‘e ai loa se tofā ua talafeagai le vaai o se isi fale e faamautu ai lava galuega nei a le tupulaga o le ekalesia i totonu o Afega.
Ua mae‘a le fale ma o lea ua toe faagasolo taumafaiga a le fanau ina ia fausia ia meaafale ma faatau atu auā se tupe maua a sui nei o le autalavou.
O se pisinisi ua saili ai nei tamaoaiga o le tupulaga talavou ma na amata lava i le aso na umusa ai lenei taumafaiga le faatau e le mamalu na agai atu ma maimoaina  a latou galuega, meaafale na fausia e le tupulaga.