O se manatu o le afioga Tupuola Pasikale Faoagali o loo aumau i Melepone, ua tatau na toe faafoi i le faavae (basics) tapenaga a le ‘au a le atunuu a o lea e lava le taimi. O lenei saunoaga na faia e Tupuola i le ‘Samoa Taimi’ i le tuanai o le tauvaga i Gold Coast.
O Tupuola Pasikale Faoagali o Poutasi ma Vaivasetai o se sui iloga o le aulakapi a Moataa i le sefululima ma le taitoafitu. O le 1987 na filifilia ai i le aufili Soka a Samoa e taaalo ma Niu Sila All Whites i le Apia Paka ae o le 1994 na malaga mai ai ma le Manu Samoa i Ausetalia nei.
O le tausaga 1990-1993 na avea o ia ma sui o taitoafitu siamupini a Moataa i Singapore ma Malaysia. O loo matauina e Faoagali le misia e nai uso laiti o le ‘au faapea le pulega le taimi moomia e atinae talu ona tofia ae peitai e tatau lava na tagai muamua i faavae laiti e pei o le sapo o le polo, pasi, pue ma toe faafoi mai le polo mo osofaiga.
“O loo vaaia foi le tao tasi o osofaiga mai lea itu o le malae i lea itu ae tatau ona fai ma tutu‘i le ogatotonu e maua ai avanoa o faatini i fafao.”
Na saunoa foi Tupuola Pasikale Faoagali ua leai ni agavaa (skills) e kiki ai le polo e faasese ai le puipui a isi ‘au ma kiki e toe maua lava ma sikoa ai. “O Fiti, Niu Sila ma Aferika ‘au o loo faaaogāina tele nei auupega tāua mo le taaloga, pau le itu o le toe faafoi i tua o le a‘oina o nei agavaa auā taaloga faigata ma faamasani ai mo lenei tausaga.”
O le susuga ia Lolo Lui ma Mikaele Pesamino sui talu ai na agavaa tele i nei agavaa ma o se itu e tatau ona sailia vave se tasi e lelei i nei tomai. O le tausoga o Faoagali le taitaimalaga o le taitoafitu ia Malo Nofoagatoto‘a o loo galulue ma le faiaoga ia Viliamu Punivalu.
O le 1992 na siamupini ai le taitoafitu a le Manu Samoa i le tauvaga i Egelani o le Middlesex 7’s lea na atoa le selau tausaga o faagasolo ae masii atu le Manu Samoa sola mai ma le ipu. O le kikipolo ma le fesi i lea aso o Tupuola Pasikale Faoagali.
