Toe amata e se Samaria agalelei le Faofao Beach Fales

Na malaga i Samoa le alii tusitala o Hamish Coleman, e lipoti aafiaga o le atu Aleipata ma isi vaega o Upolu i le galulolo, ae na oso ai ma lona agaga alofa e fia fesoasoani i tagata ua mafatia, aemaise o nai pisinisi e pei o faletalimalo tu matafaga i le Mata Aleipata ua fufulu uma e le galulolo, e pei o le Faofao Beach Fales.
O le iva o aso talu ona tuanai le faalavelave, ae faateia le susuga Tapu ma lona aiga i Saleapaga ina ua afea e le alii o Hamish ma faailoa i ai, o le a ia fesoasoani e toe faatu lana pisinisi.
E lei talitonu Tapu e moni lea faaaliga a le alii mai Niu Sila, peitai ina ua taunuu atu le loli a le aoga o le Don Bosco i Alafua ma le fata ua uma ona fai e toe amata ai le pisinisi i se pa pia, na faatoa talitonu ai e sao le alii tusitala.
Na sosoo atu ai ma le taavale na avatu ai le uta o pusa pia ma fagu malosi faapea ma fagu uaina.
“O ai na iloa e afea au ma le aiga i se taumafaiga agalelei faapenei.
Ai o le mea tonu lea e sa‘o ai upu a le tusi, o lou agalelei atu i isi e toe tauia lava e nisi Samaria agalelei”, o le tala lea a Tapu, o se tama talavou o Saleapaga ua leva tausaga o faafoe lana pisinisi o fale talimalo Samoa e nonofo ai turisi i luga o le matafaga.
Ua leai ma se fale o toe tu o lana pisinisi, e oo lava i fale sa nonofo ai ma lona aiga.
Ua mafolafola atoa le laufanua ma iloa atu isi vaega o le nuu aua ua lalo uma fale o nisi aiga ma lalo atu ai ma laau tetele e pei o ulu.
Fai mai le alii o Hamish na alu i Niu Sila ma talanoa ma nisi o ana uo, ma amata ai loa le latou suegatupe.
O le $4,000 tala Samoa na muamua mai ma ia e amata ai le fesoasoani lea ua faatu ai le faleie ua iai ma le pa pia.
O le a toe foi i Niu Sila e aumai isi tupe ua maua e amata ai ona faatau totoga e fausia ai se faleaiga e tau ina amata ai, sosoo atu ai ma le fausia o ni fale nofo mo tagata turisi.
O le amataga lea o le toe faatulai mai o le Faofao Beach Fales. Fai mai le alii o Hamish o le agaga lea o lana fesoasoani faatasi ma isi ana uo, ia faafoi le loto finau ma ia aua nei mate le faamoemoe o nai tagata sa tua lelei i nai pisinisi faletalimalo ao lei afea e le galulolo.
O le agaga foi lea o le alii o Tapu ma lana fanau ia faaaoga le avanoa lea ua maua e toe atiina ae ai lana taumafaiga, aua e lelei tupe sa maua, ae talu nei ona faalalo fale ma vaega uma e le galulolo, ua leai se seleni e toe tau faufau ai le pisinisi.
O le taimi nei ua faasee uma le aiga o Tapu ma nonofo i fanua tu uta o lo latou nuu, ma o lana tala fiafia lea, o le a faamautu i uta lona aiga, ae faaaoga loa le fanua i tai e toe fausia lelei ai lana pisinisi.
“E lelei lea mo le maua e tagata tafafao o le privacy, ma maua ai foi le saogalemu o ola o lo‘u aiga”.
O loo fuafua Tapu e tuutuu i uta i lalo ifo o auvae mauga lana taumafaiga, ae faamamao ese ma le matafaga, atonu e vave ai ona latalata i nofoaga maualuluga e maua ai se lafitaga pe a tei ua toe oso mai se isi galulolo i se taimi lata mai.