Toe alia‘e foi faiga a Zac Guildford

Ua toe vesia foi le lotoifale o le Iuni Lakapi a Niu Sila faapea le Iuni Lakapi a Canterbury (Crusaders)  ina ua toe manu a‘e foi faiga a le alii lakapi a le All Blacks ia Zac Guildford i faiva faalumaina ua aafia ma ta‘uvalea ai Iuni e lua i le taaloga o le Lakapi. Ua toe faamalolo lē tumau nei foi lenei le alii lakapi mai i tulaga o loo iai i le va ma le Iuni Lakapi a Canterbury le (Crusaders) ina ua toe tulai mai foi nisi o moliaga i ni aafiaga i se faalavelave i le faaiuga o le vaiaso na se‘i tuanai atu nei.

Na ioeina e le alii ia Zac Guildford 23 tausaga lona aafia i se mataupu i se faalavelave na tulai mai i le faaiuga o le vaiaso na se‘i mavae, ua ia faailoa foi i le pulega a le kalapu a Crusaders le alii faiaogaulu ia Todd Blackadder ma ua taofia ai lona toe auai i totonu o le ‘au i le taimi nei se‘i mae‘a sailiiliga a le Iuni lakapi a Niu Sila faatasi ai ma le pulega a le Crusaders.

Na matuā faaalia le faanoanoa tele o le Pulega Faatonu o ia Iuni Lakapi ina ua logotala i lea foi mataupu ua toe aafia ai lenei alii lakapi, e tusa ai la ma se faaiuga i sailiiliga faaauau o loo faia pea i le taimi nei.

O lea ua tulai mai ai le Iuni lakapi a Niu Sila e faatino tulaga masani ai i faatalatalanoaga ma lē ua aafia i lenei faalavelave, o se avanoa e saunoa manino ai Zac Guildford i luma o le pulega faatonu a Niu Sila i le lakapi ma faaauauina ai pea sailiiliga i le mataupu ua tulai mai.

O se tasi foi lenei o tulaga faafoeina o faatalatalanoaga e ao ona matuā lelei faatino ina ia atagia ai le leai o se faaituau o le faaiuga aemaise ai le avanoa e faaalia ai le aiā tatau faaletagata soifua.

Tele nisi aafiaga muamua o lenei alii i tausaga talu ai i le taumafaina lea o le ava malosi lea sa lē mafai ai ona ia taalo ai i nisi o taaloga filifilia i le tausaga ua mavae.

Aemaise ai foi le avanoa sa mololo atu ai i Rarotonga mo tafaoga ae aafia ai foi i aafiaga lava ia o le faalumaina i le ava malosi. Sa tautino foi le alii ia Zac Guildford o le a ia pulea lelei lona tagata i le faaaogāina aemaise le taumafaina lea o le ava malosi e aunoa ma le toe aafia i nisi faalavelave, ae o lea lava o loo lipotia pea lenei alii i ia aafiaga matagā ma le faalumaluma.

E oo lava foi i lona filifilia ai i le Au lakapi a le atunuu o Niu Sila sa faapea lava foi ona molia ai i le faaaogāina o le ava malosi ma le lē fautuaina, ua atagia mai ai i lea mataupu e lē o aoaoina lava lenei alii i mea muamua sa tuuaia ai i tausaga ua mavae.

Masalo poo se taimi o le vaiaso fou o le a faaauau ai ona sailiili le totoa lelei ai lenei mataupu ma atonu e faia ai foi ma se faaiuga lelei talafeagai e faamalieina ai le toatele.