Toe alia‘e le TB i Samoa

O le faama‘i o le fatafata vaivai poo le TB (tuberculosis) o se faama‘i ua tele tausaga o faalogoina le aafia ai pea o tagata o le atunuu, e ui ua leva ona iai galuega ina ia tafiesea mai i Samoa. E ui i lea ua agai lava ina lē toe faalogoina i Samoa.

E ui i lea tulaga, o lea ua toe faagasolo le tele o polokalame faalauiloa e lapatai ai le atunuu i le fatafata vaivai. Na tāpā se finagalo o le Matagaluega o le Soifua Maloloina pe aisea ua toe vaaia ai lapataiga faapea ae ua oo i lenei vaitau ua tatau ona lē toe vaaia lenei gasegase i Samoa.

O le faamatalaga mai i le tasi o Ofisa Sili Lagolago o le Matagaluega, Toleafoa Leausa Dr Take Naseri, o le gasegase o lenei e pei o le gasegase o le lepela, e umi lava se taimi o tau togafitia.

E ui la ua laitiiti le numera o tagata Samoa o loo aafia ai ae e lē mafai ona tuulafoaia auā e ono faaopoopo ai loa le numera. Ua mautinoa ua iai le faaopoopoga o lana faamatalaga lea ae e lē o i se tulaga e ono faapopoleina ai le atunuu.

“E lē atoa se to‘a 20 o maua ai i le taimi nei ma o gasegase na o loo tausavali lava le Matagaluega ina ia mafai ona faaauau togafitiga.

O lona uiga e iai le tausi soifua i le fale i aso uma auā o aso uma e fai ai inumaga o fualaau. E tatau ona vaaitino lava le tausi soifua ua inu fualaau nei faato‘ā tuua ai le gasegase.

O gasegase o loo latalata mai i le tatou ofisa i Apia o loo mafai ona omai sa‘o i le falemai ma e tatau lava foi ona vaaia le faia o inumaga a o lei tuua le falemai,” o le saunoaga lea a Dr Naseri.

O le laitiiti lava o le taimi e togafitia ai se tasi ua maua i le fatafata vaivai, e pei ona ta‘ua e le alii fomai, o le ono masina. Faaalia e le alii fomai o le laitiiti lava lea o le taimi ae o gasegase tuai nei e ono autausagā lava o taumafai e aveese atoa mai i le tagata e aafia ai.

Faaalia e le alii fomai, o le taimi lenei o loo iai lava foi i latou o loo maua togafitiga mai i falemai faaitumalo. Sa ta‘ua foi e le vaega o loo faatinoa faalauiloa o lenei gasegase mo le Matagaluega e faamaonia ua iai le faaopoopoga ae e lē o tele.

Ona pau le lapataiga o loo faia ona o le manatu e tatau lava ona puipui le atunuu auā o le pepesi o le flu e ono aafia ai pe a lē togafitia le atunuu ma unai ai le numera o i latou e maua i le TB poo le fatafata vaivai.

Ua iai fuafuaga e tatau ona oo atu i le tausaga faatapulaa o Manulauti o le Meleniuma a atunuu uma o Malo Aufaatasi, ua matuā tafiesea le TB mai Samoa ma o se tasi lava lea o mafuaaga o le mata‘itū lelei e le Matagaluega o le Soifua Maloloina o lenei faafitauli nei mea ane ua faaopoopo ma tuai ai lava ona ausia lea manulauti e pei ona iai tuutuuga a malo uma o le lalolagi.

O aso uma ua faalauiloa ai lapataiga o le TB ma o āuga masani lava e amata ai o le fiva e femoumouai, o le tale ma le alu o le tino ma ua fautuaina lava le atunuu ona o le pepesi o lea gasegase ma umi se taimi e taumafai ai e matuā tafiesea mai i le tino o le tagata.

“E lē tatau lava ona faatamala le matagaluega mai i le faia pea o suesuega aemaise o le faaauau ai o togafitiga, auā o le taimi e faatalalē ma manatu ai e lē o toe tele se aafiaga o le atunuu i le TB, ona iloa loa lea ua toe alualu i luga le numera o i latou e aafia i lea gasegase”.