Toe agai le talo a Samoa i Niu Sila ma Amerika

Ua sauni nisi kamupani se lua i Samoa e toe amata la‘u mai le talo a le atunuu, e faatau atu i Niu Sila faapea foi le isi uta o le a agai i le Iunaite Setete o Amerika.
O le kamupani a Ah Liki faapea le kamupani o faleoloa laiti a le Indoors lea ua lipotia mai le galulue i le vaiaso na tea nei e faatumu nisi o pusa la‘u oloa poo containers ta‘i 20 futu le uumi i le fale o loo la‘u ai oloa a le malo i Atele. O le kamupani a Ah Liki o le a agai mai lana uta o talo i Niu Sila, ae o le isi vaega a le Indoors o le a latou la‘uina le talo i le Iunaite Setete.
O se tala fiafia lea mo le aufaifaatoaga aemaise lava i lenei foi vaitau o loo faaaogā le fuataulu, ua tau telegese ai le taulia o le talo i le maketi. Ae o le toe tatala mai o lenei faitotoa lautele mo le agai o le talo i atunuu i fafo, o se avanoa lelei o faifaatoaga e la‘u ai fua o a latou faatoaga i fafo mo se isi seleni faaopoopo, aemaise lava ia i latou o loo matuā tetelē maumaga ina ia lē maimau le talo pe a tuai ona taulia i le maketi.
O se tasi o na faifaatoaga o le susuga ia Ieremia mai Lotofagā, Safata. Ta‘ua e lea faifaatoaga, sa masani ona $46 tala i le taga talo e 20-kilo le telē, ae i le taimi nei ua na o le $40 pe $41. Ae i lona ia taofi, e ui lava ua toe pa‘ū ifo i lalo, ae sili mamao atu o la e maua mai pea le seleni, nai lo le na o le taatitia o talo i le maketi i Fugalei i le aso atoa ma lē taulia.
O le fili lea o le au faimaumaga i le taimi nei, ona o loo matuā malosi foi le fuataulu i lenei taimi. O lea ua sili ai la le mautinoa o loo taulia le talo i le avatu i nei uta mo atunuu i fafo, ma o loo fiafia ai lava i latou.
O le talotaloga o le susuga Ieremia, ia toatele nisi poo ni kamupani latou te la‘uina le talo i atunuu i fafo, ina ia alu alu lava toe siisii teisi ai foi i luga le tau o taga talo mo latou.
O le aso 17 o le masina nei o loo fuafua e toe la‘u ai le isi uta mo containers e lua ia e agai atu i Amerika.
E iai le fuafuaga o loo taumafai ia maua le lima i le ono ni containers e mafai ona lafo atu i le masina i nei faitotoa i fafo mo le talo. Pau le luitau ua tau aliali mai le taimi nei, ua amata ona tau lē lava le tetelē o fale ia e la‘u i ai le talo mo le fafaoina i containers.
O le itu la lea ua tau tilotilo atu i ai kamupani o loo faamaopoopoina le la‘uina o le talo o le fia faatetelē o fale ma vaega o loo la‘u ai le talo auā i le taimi nei, e na o le lua ni containers e mafai ona ofi i le vaega o loo la‘u ai le talo.
Na faalauiloa talu ai nei e le Malo le iai o se fale o le a fausia i le Uafu i Matautu, e fuafua mo le la‘uina ai o nei oloa a le atunuu mo le auina atu i fafo.
Pau le itu o loo mananao i ai i latou ua auai i lenei polokalame, ia faatulaga lelei e le malo se taiala ina ia mautinoa o loo siaki lelei ma vailiili uta talo uma o loo ave, ma e tatau ona faatino uma na sailiiliga ina ia mautinoa o loo lelei atoatoa talo e auina atu i fafo.
O se itu e tatau lava ona faatāua auā afai e lē faamalieina foi kamupani i fafo aemaise tagata faatau, ona vave foi lea ona toe tapuni mai lenei avanoa lelei ua toe maua mai.
O loo faagasolo nei feutagaiga a le malo ina ia saili se avanoa mo se maketi e la‘u ai le talo i Ausetalia.