Ua toe mata‘itu nei e Amerika Samoa le puipuia o ona uafu ma malae vaalele mai tagata femalagaa‘i i le va o Samoa e lua, ina ua faamaonia ua toe tulaueleele le swine flu poo le faamai o le fulu e mafua mai i meaituaolo i Apia.
O se polokalame faalauaitele a le Matagaluega o le soifua maloloina na faaalia le maua o se tina ma‘itaga i auga o lea ituaiga o flu. Ua faailoa e le alii fomai le afioga Toleafoa Dr Take Naseri, o le tina ma‘itaga ua aafia sa matuā tigaina i auga o le flu ma avatu ai mo ni togafitiga i le maota gasegase i Motootua.
Sa iai masalosaloga i auga o le swine flu ua aafia ai le tina ma‘itaga e pei ona saunoa le alii fomai o Toleafoa, peitai e lē mafai ona faamaonia seiloga e ave i Niu Sila mo nisi suesuega atili, lea na faamaonia ai o le tina ma‘itaga ua aafia i le fulu o meaituaolo. O le maua mai o le taunuuga o ia suesuega na mafua ai loa ona toe faamanatu i le atunuu puipuiga masani mai le pepesi o le fulu masani.
O le naunautaiga o le matagaluega ia mafai ona puipuia le atunuu atoa ma nofo sauniuni i puipuiga masani ina ia taofia ai le pepesi o le swine flu. E lē o toe maua nisi faamatalaga mai le Matagaluega o le Soifua Maloloina e tusa ma le tulaga ua oo i ai le tina ma‘itaga ua aafia, ae o loo nofo sauniuni vaega uma o le matagaluega e nafa tonu ma taimi o togafitiga ma puipuiga pe a pepesi ma toatele nisi o le a aafia, e pei foi ona faatino ia sauniuniga uma ina ua faato‘ā ulufale lea faamai i Samoa i le tausaga ua mavae, lea na avea ni teineiti aoga na malaga mai Ausetalia mo se latou tafaoga ma faamasani i le olaga i Samoa ma auala na oo ai le swine flu i le atunuu.
O loo talosia ia aua ne‘i toe oo i se tulaga na iai le tausaga ua mavae, i le toatele o nisi o le atunuu na aafia, lea na maliliu ai foi nisi e aofia ai se tina ma‘itaga ona o auga o le swine flu.
O loo molimauina le aafia o nisi o le atunuu i le fulu masani, ma o le fautuaga lava a le vaega o le soifua maloloina ia nonofo lelei i fale ma fai se malologa lelei ae aua le feoai, ma le pipisi o siama. Ua ave foi le tuualalo i le atunuu ina ia taumafai e tau mamao ma tagata e lei aafia, aua e vave tele ma saoasaoa le pipisi o siama o le flu.
