E faaauau i le vaiaso lenei le galuega alofa o loo ua vaaia i vaega eseese o Samoa na aafia i le sunami o le 2009 e ui ua tau masina talu ona tulai mai lea faalavelave i le atunuu.
O le fesoasoani na amata i le masina o Mati lona faasafua atu e mai le vaega o faalapotopotoga tumaoti i totonu o Amerika.
O Samaria agalelei nei na tauaao i ai e le Malo tele o Amerika se tinoitupe e afa miliona tala Amerika poo le $1.2 miliona tala Samoa ina ia o latou faatauina ma momoli i Samoa ni fesoasoani e ese mai i taumafa.
O se fesootaiga na faatautaia mai e i latou na faatinoa le aoina o lenei fesoasoani ua taua o le Samaritan’s Purse i Amerika ma faalapotopotoga lotu i Samoa e pei o le Lotu Porotesano ma le Aoga Tusi Paia o le Rhema i Taufusi, ia na faamaopoopo i ai le oo atu o le meaalofa lenei mai Amerika.
O i latou foi na faasoa atu le fesoasoani lenei ua faaauau ona tufatufaina i lenei masina faatasi ai ma le fesoasoani a le Komiti faapitoa a le Malo e tali atu i faalavelave faafuasei ma le Koluse Mumu a Samoa.
O nisi o nei fesoasoani ua mafai ona faatau i lalo o le meaalofa lenei, ua aofia ai fala, o ieafu, uili paelo, moli matagi ma isi meatotino e faaaoga e aiga i le soifua ai i aso taitasi a o faagasolo le fausia o o latou maota.
E le gata i lea ua faapea foi ona iai le isi vaega lona lua o lenei fesoasoani ua tufa atu ai i aiga uma na aafia ogaumu karasini, o suo, piki, agaese, ipu, ma meafaigaluega e mafai ona fesoasoani ai i aiga i le toe fausia o nofoaga e faamautu ai.
O le faatinoga o lenei fesoasoani na ave sa’o le tupe e ala mai i le Ofisa o Amerika i Samoa i faalapotopotoga fesoasoani ma le lotu Porotesano i Samoa, ona faatau mai ai lea o nei meafaigaluega ma manaoga o aiga mai faleoloa i Samoa.
E tusa ma le 300 aiga i afioaga e silia i le 20 ia na aafia ua oo i ai lenei fesoasoani ma o loo faaauau pea i le taimi nei seia mae’a lelei aiga ua manatu faalapotopotoga ua fesoasoani ia Amerika i le tufaina o lenei meaalofa o loo tatau ona ave i ai lenei fesoasoani aoga.
Ua aofia uma ai le atu Aleipata, le atu Falealili faapea vaega o Manono ma Savaii ua aafia.
Faaalia e le sui o le malo o Amerika i Samoa, o se tasi lenei o faailoga o le fia lagolago pea o Amerika ma ona tagata i e ua aafia i faalavelave faalenatura i Samoa.
Ua iai foi le popolega tele o tagata o lea malo tele i le soifua o tagata na aafia i lea faalavelave i totonu lava o Samoa.
Faaalia e le sui o le Samaritan’s Purse o loo i Samoa mo lenei galuega fesoasoani o Paul Murphy, ua vave faatino le galuega ona o le taufai fesoasoani atu foi o faalapotopotoga, aiga ma nuu i Samoa ina ia faafaigofie ai le latou galuega ma e ui i puapuaga na feagai ma tagata ua oo i ai, e manino lava le vave ona toe foi Samoa i le soifua sa iai a o lei tulai mai le faalavelave ma e fai mea fiafia lava ona tagata e ui ua tele se aafiaga mai i lenei faalavelave tele.
O le faalapotopotoga lenei o le Samaritan’s Purse e faauluulu i ai se alo o le Faifeau fai evagelia lauiloa o Amerika o Billy Graham o Rev Franklin Graham.
O le faafetai mai i tagata o Samoa na molimoli e le susuga i le faafeagaiga Rev Nuuausala Si’utaia o le Ekalesia Porotesano lea na saunoa i le maoa’e ona vaaia o le lima foai mo tagata Samoa ma ia faafetaia ai loa tagata ma le Malo o Amerika ona o lenei agalelei ua tino mai i lenei foi fesoasoani.
