O le vaiaso muamua lava o aoga a le fanau i Samoa nei, lea na a‘e atu ai le fanau i le afioaga o Fasitoo-tai ae faafeiloai e se pa ua toso i le auala o le aoga. O le upu ua fai ane i faiaoga ma le fanau aoga e lē o toe tatala le faleaoga a le afioaga.
O le tulaga ua iai le ta‘ape o le afioaga i lana faiganuu o lea na iu ai i le tapunia o le faleaoga.
O le komiti a le afioaga o loo nafa ma le aoga na saili fesoasoani i le Matagaluega o Aoga, Taaloga ma Aganuu ona o le itu lea o le aoga tulagalua a le afioaga o loo i lalo o le tulaga lea o le aoga a le Malo. Talu ai ua vaeluaina le nuu o lea ua foliga mai ua taofi ai e le isi faiganuu le aoga ae o loo manao le isi itu e amata.
Na fesiligia sui o le afioaga i le faaiuga o le vaiaso na tea nei, i latou ia na taofia le auala e sa ona toe uia e fanau na agai atu i le aoga ma faapea mai ai o lea e toe a‘e le aoga a Fasitoo-tai i le vaiaso lenei.
O le faaaliga na aumai o le a agai lava foi Fasitoo-tai e saili e i latou ni meaafale ma ni mea faufale ina ia toe faaleleia ai le faleaoga na faapea ona leaga ni vaega ona o le afā o Eveni.
O le vaiaso na tea nei na faamautu ai le fesoasoani a le Malo o Iapani mo aoga e lua i totonu o Samoa, o le faagasologa o le fesoasoani a lenei Malo i talosaga na avatu e komiti a aoga i le atunuu mo le toe fausia o a latou galuega ua iai ni faaletonu.
O le aoga a Fasitoo-tai le tasi o aoga e lua na maua le fesoasoani mai ia Iapani i le vaiaso na tea nei ma o le aoga lava lea e sili laititi atu ma le kuata miliona tala Samoa le tupe na faapea ona tuu atu i ai mo le latou faleaoga lea na ta‘ua le faaleagaina i le afā.
O lea la ua faamatuu atu le fesoasoani a Iapani ae o lea e lē o lelei le va o itu e lua o le nuu e tatau ona agai faatasi mai e fau le faleaoga.
O le faamatalaga a sui o le nuu na taofia le toe tatala o le aoga, ia ua agai mai i lenei vaiaso e toe tatala le faleaoga, faitalia le latou komiti poo fea e ave i ai le latou tupe ae o le toe fausia o le faleaoga a Fasitoo-tai o le a tagi lava i lima.
Na fesiligia sui o le Komiti a le aoga a Fasitoo-tai i lenei mataupu ae na o latou ta‘ua e tasi lava le ‘auga o le tupe lenei o le toe faalelei ai o le faleaoga a lo latou nuu ma o le mafuaaga foi lea na faaalia e le komiti na agai mai ai lava i le Matagaluega o Aoga mo se fesoasoani.
O lea la ua toe a‘e le aoga ma ua sauni foi le Komiti e feiloai ma le vaega o le afioaga lea ua toe tatala faleaoga mo le fanau.
