Ua toe a‘e uma nei aoga i Samoa e pei ona vaaia i le vaiaso muamua lenei o
le toe amatalia o a‘oa‘oga a le fanau le tutumu o pasi i le taeao ma le afiafi faapea
taavale a mātua ma aiga mo le momoliina ma le toe aumai o fanau pe a tuua.
O le tausaga fou lenei ua amata faamamalu ai nisi o tapu poo sā faapea ma suiga fou i aiaiga e faafoe ai aoga uma a le Malo.
O le a fā kuata faalea‘oa‘oga ma o se suiga ua lagolagoina e nisi o ekalesia mo a
latou aoga e pei o aoga a le EFKS ma le Katoliko. O aoga a le Katoliko o le a tumau lava le pili e leai se siitaga peitai o le faaopoopo
o le isi kuata ua faaopoopo ai ma pili
e totogi o le fanau i le tausaga.
O nisi o suiga ua faailoa e le Matagaluega o aoga mo aoga lava ia a le Malo e aofia ai le faasā poo le tapu ona toe faaaogā e fanau aoga masini computers o le ituaiga o le laptop.
Ua mafua lea tulaga ona o mau e faapea o ia masini o loo faaaogā e tamaiti e matamata ai ata tifaga ma isi ata lē manuia, e pei foi ona maua nisi fanau aoga o matamata i ia ituaiga o ata i telefoni feaveai lea ua lē toe faatagaina ona umia e tamaiti i le taimi o loo feagai ma mataupu o le aoga.
E manino mai i le aiaiga o le tapu e faatoa mafai ona toe umia e fanau a latou telefoni feaveai pe a tuua ma toe foi i o latou aiga.
E le o iloa pe o mulimuli foi aoga a ekalesia i lea tapu mo aoga uma a le Malo peitai e pei ona silafia, o le tausaga ua tuanai na
faatea ai ma se kolisi i le taulaga se tamaitai aoga na ia pue i lana telefoni feaveai
se ata matagā ona ia lafo lea i lana uo tama
o se alii foi e aoga.
Peitai na maua e nisi o uo a lea alii aoga le ata ona latou faasalalau atu lea i isi tamaiti ma salalau ai le ata matagā. O se kolisi maualuga a se ekalesia sa aoga ai lea tamaitai.
O le faanaunautaiga o le Pule sili ma le matagaluega o aoga a le Malo ia avea
nei suiga ma vaifofo i le tele o faafitauli eseese ua aafia ai nisi o fanau aoga ona o le faaaogāina o ia ala o fesootaiga. O se tasi o suiga o lenei tausaga mo aoga a le Malo, o le faamalosia lea o meaai paleni mo fanau. Ua faaalia e le Pule sili le afioga Matafeo Tanielu Aiafi, o se tulaga
ua tatau ona faamalosia ona o le fia
fesoasoanii le togafitia o gasegase eseese ua
aafia ai le ola mu‘amu‘a o fanau.
O se tasi lea o manulauti a se komiti faapalemene o loo taitaifono ai le Fofoga Fetalai, e pei ona sa latou asiasia ai aoga
uma i le atunuu i lena tausaga ua mavae
ma faamalosia le tatau ona suia meaai
e aai ai fanau i totonu o aoga.
O le tino puta, le toto maualuga ma le suka o nisi o gasegase lē pipisi ua saoasaoa le aafia ai o o tatou tagata lea ua aafia ai foi ma fanau ona e mafua i suiga o le soifuaga
po’o lifestyle diseases.
