Toe a‘e tuuaga mo se vaiaso a aoga

Ua toe foi i faleaoga fanau a le atunuu i le maea ai o le tuuaga aupito laititi a fanau aoga o Samoa. E toe a‘e aoga ae sa iai lava isi aoga na faaauau a latou mataupu o le vaiaso na tuanai atu ona o le popolega i le le lava o le taimi e faamaea ai polokalame ua maea faataatia mo lenei tausaga faaleaoaoga.
O le lua vaiaso lea na faamalosia ai le tapunia o aoga uma a le atunuu, i puipuiga o le pepesi o le gasegase o le swine flu o lea la na tau faatasi mai lava i le tuuaga o le tasi le vaiaso lea faatoa maea atu.
O le kuata mulimuli la lea ua faaauau atu faatoa tuua ai le fanau ia Tesema.
Na amata mai lava i le tausaga e 2007 le tau faavasega ai o tuuaga a fanau ina ua umi se taimi o malolo aua le taligamalo a Samoa i Taaloga o le Pasefika i Saute.
O tuuaga ina na toe fesuiai ai kuata o aoaoga i le tausaga ina ia mautinoa e maea aoga a le fanau i le tausaga ua maea foi ona aoaoina polokalame faatulagaina o lea tausaga.
O le tausaga nei la lea ua toe tulai mai ai foi lenei tulaga ona o le pepesi o le swine flu i Samoa na maua ai o le tele o fanau aoga ua pepesi i ai le gasegase ma tulai mai ai se popolega i le Matagaluega o le Soifua Maloloina i le faateteleina o lea tulaga a o tau taofiofi ai le pepesi o le siama o le AH1N1.