O se taaloga sa faatulagaina i le va o le aulakapi liki a tamaitai a Samoa, le Fetu Samoa, ma le auliki a Ausetalia le Jillaroos, o se vaega o tapenaga mo le faamanatuina o le Teuila o le 2011.
O se tasi lea o auupega malosi ma se gaioiga sa avea o se isi faatosina tele mo tagata tafafao mai fafo, e agai atu i Samoa ma maimoaina polokalame o le Teuila o lenei tausaga.
O se pepa o faamatalaga sa faamatuuina mai i le Samoa Times o loo faamaonia ai, e toavalu ni tamaitai sa taaalo muamua i le ‘au faavaomalo a Niu Sila, le Kiwi Ferns, ua sii o latou lima ma filifili e fia auai mo le ‘au a Samoa, le Fetu Samoa.
E lē gata sa avea ma sui o le Kiwi nisi, ae sa avea foi ma sui o le aulakapi iuni, e aofia ai ma se tasi sa taalo mo le Kiwi, ua avea ma fomai physio mo le Fetu Samoa, le tamaitai o Tammi Wilson.
O le tamaitai kapeteni o le Fetu Samoa, o Luisa Avaiki, o ia foi sa avea ma sui o le Kiwi Fern i le tele o tausaga, sa ia ta’ua e faapea, ua sauni sui o le Fetu Samoa, e faia se taaloga maoae, ma e tatau foi ona matagaofie sona taunuuga.
O se tasi o vaega tāua o le saunoaga a le tamaitai kapeteni, sa ia toe faamanino ai le tāua tele ona manumalo i le taaloga ma le Jillaroos a ASusetalia.
O se faaamalosiau lelei mai lea mo sui fou o le Fetu Samoa, ua ulufale mo le taimi muamua i le ‘au a le atunuu, e saga tapue ai le taleni ma agavaa mo le lumanai.
O le iai o nisi iloga ua leva ona taaalo i ‘au faavaomalo e pei o sui tuai o le Kiwi Fern, o loo iai agavaa ma tomai faapitoa i le taaloga, o le a fesoasoani tele i tamaitai fou o le Fetu Samoa, e ala i le taaalo faatasi, ma o lesona lava gaioiga uma o le faatinoina i totonu o le malae ma fafo.
Saunoa foi Luisa, o le isi lea fua taualuga o le ofoina o latou taimi mo le au liki a tamaitai o le atunuu i Samoa, ona o le naunau ina ia atinae le lakapi liki, ina ia faapei ona logolgoa o le lakapi iuni mo Samoa lava latou ia, O le lakapi iuni o se tasi o taaloga ua ta’uta’ua ai Samoa, ma e manatu e tatau foi ona faapea le lakapi liki.
Ua tatau ona amata tapena ma tapue atu le auliki a Samoa mo le taimi nei, e sauni atu ai mo le taamilosaga tele a le lalolagi, o le a faia i le tausaga e 2013.
O le taaloga i le va o le Fetu Samoa ma le Jilaroos a Ausetalia i le Teuila o lenei tausaga ua faatulagaina o se tasi o sauniga mataina mo faafiafiaga o le Teuila.
O le vaiaso na tea nei na faamavae atu ai i nisi o tamaitai Samoa i Aukilani, mo le malaga atu ai i Samoa mo le taaloga e pei ona fuafuaina.
‘Au a le Fetu Samoa 2011
Luisa Avaiki (C)
Tolupene (Neta) Peau
Theresa Malaitai
Mele Angelia Leuluaialii
Kally Leota
Marie Frances Leota
Seeseei Hellen Tafa
Sharon Jacinta Chungson
Cynthia Taala
Madonna Seifono Schmidt
Victoria Apulu
Sarah Faasegi Clayton
Chloe Leaupepe
Billy-Jean Ale
Valerie Leataata Davis
Alaiumu Sao Taliu
Aieshaleigh Smalley
Tasia Seumanufagai
Vicki Lee Nafanua Campbell
Foaiina Maria Chong Nee
Tuiai Elisara
Karameli Tiffany Faaee
Unaloto Sili
Maitua Feterika
