Toavalu maliliu mafuli pasi Solosolo

Na amata leaga lava le vaiaso lona lua o Novema ina ua mafuli se pasi ma maliliu ai le toavalu o le pasese na malaga atu ai ae faamanualia le toa 22.
Ua faaigoaina e Leoleo ma le Falemai lenei faalavelave o se tasi o faalavelave aupito ogaoga le matautia ma vaaiga ina ua taumafai e aveese le pasese ma taumafai e faaola i latou na aafia ai.
E muliga foi le tumutumu i le aso na tulai mai ai le galulolo i le taufaaofiofi i le malumalu o le Falemai tele i Motootua lea e i autafa o le Fale Maliu o le Maota Gasegase a o gasolo atu aiga e faamaonia e ua maliliu i lenei faalavelave.
O le faamatalaga a Leoleo, o le pasi e faimalaga atu i Apia ma e femalagai i le va o Apia ma Lalomauga. Na taua e ni molimau sa muamua taunuu i le vaega na tupu ai le faalavelave, o le saosaoa tele o le pasi na mafua ai ona taavalevale ona o le taimi tonu lea sa maligi ai timuga, ma atonu na taumafai le avepasi e mimilo tu le pasi i le pioga i Luatuanuu.
E lei faamautu mai lea gaioiga i le taimi nei ona o loo faaauau suesuega a Leoleo ae o se faamatalaga a se tasi o  molimau maumaututu sa iai i le taimi na tupu ai le faalavelave ina ua taunuu atu i ai, o se vaaiga matautia na faateia ai – ua matua leaga faia le pasi, ua u i luga uili, ma o se vaaiga faamomoi loto i le vaai atu i le pasese a le pasi o loo tauvalaau mai i le fia ola.
Ina ua o latou taunuu atu, na o latou taumafai e tau faatu sao le pasi ma faatino galuega laveai, peitai ane, afai latou te taumafai e fuli le pasi, e ono afaina ai le isi vaega o le pasese.
O se faamatalaga a lea molimau, o le masini ua pato o loo faaaogaina i le galuega o lona fale talimalo, sa faaaoga e aveese ai le fale o le pasi, ina ia aua nei afaina tele nisi vaega o le pasese. 
Na faatinoina loa lea galuega laveai, ma amata ai ona aveese mai le au maliliu o le pasese a le pasi.
Taua e Leota Laki Sio o Solosolo, o se vaaiga uigaese na o latou tau mai i ai, ona o le toatele o le pasese a le pasi, e afa le vaega o le tino o tautau mai i fafo, ae o le isi afa o tino o loo omia i totonu o le pasi.
E tele se galuega fesoasoani e tatau ona faatinoina ina ia mautinoa le le toe manunua atili o nisi o le pasese.
E taunuu atu le taavale fuimu, e leai ni a latou masini poo ni meafaigaluega faapitoa e fesoasoani i le aveesea o vaega o le pasi ae sei lau ese i latou ua maliliu, atoa ai ma le anoano o le au manunua ua tatau ona faanatinati i le falemai mo ni togafitiga.
O le toatele o le au maliliu o i latou na pito i totonu, ae o nisi o le pasese na felelei i fafo ma le pasi.
Na taua e le molimau e taunuu atu e na o le avepasi o loo tu i tafatafa o le pasi, e le o iloa foi e i latou na muai taunuu i le mea na lavea ai le pasi o le avepasi lea o loo tu i autafa o le pasi. 
Peitai, o le taulealea lea na aveina mai le ua pato e tau aveese ai le fale o le pasi, na ia iloaina o le avepasi lea e na o le tu ua pei e valea, na faatoa iloa e i latou na faia le galuega laveai, ina ua tu‘i e lana ave masini ua pato le avepasi. E faatoa iloa ane e le toatele sa fesoasoani i le lauina o tino manunua ma tino maliliu, ina ua agi i le atoa le avepasi, ma ia faatu se tamai taavale lau pasese ae sola ai loa.
O le tumutumu atu o aiga ma uo i le Maota Gasegase na matua faateia le toatele ona e lei talitonuina le ogaoga na iai manua o nisi mai i lea faalavelave.
Na vave ona talosaga le maota gasegase ina ia aveese ma‘i tausavali e masani ona iai i le nofoaga tele lea e tau atu i ai gasegase i aso uma, ae ua fola ai moega ma faataotolia ai loa le silia i le toa 20 na taunuu atu o soifua lava ae ua manunua tigaina.
O isi na ave sa‘o lava i taotoga ona o le manaoga e laveaia soifua ua matua afaina.
O le avepasi na tigaina foi ma o loo faataotolia foi. O loo faatali lava leoleo seia malosi ona faatoa faamautu loa lea o moliaga faasaga ia te ia.
E le o faalauiloa e Leoleo le nofoaga o taofia ai le avepasi ona o le popolega i aafia lona soifua ona o lenei faalavelave.
O le avepasi e le o se taimi muamua lea ua aafia ai i se faalavelave faapenei, ma o ia foi sa lavea ai se tasi pasi laupasese iVaoala. 
Taua i ni faamatalaga a molimau, o le avepasi ua faaleaogaina lona laisese e avepasi ai.
O le faaiuga foi o le vaiaso na lavea ai le taavale a le Minisita o Aoga, faapea le isi faalavelave tau taavale na afaina ai le Minisita o Faamasinoga, faapea le taavale a le Sui Fofoga Fetalai.