Ua faagasolo le sailiga o nisi o le a umia tofiga o Faatonu poo Faamasino o le Faamasinoga o Fanua ma Suafa.
O se sailiga ua faia i tausaga taitasi ona o le faatuputupulaia pea o mataupu tau fanua ma suafa a aiga o le atunuu. O le tausaga lenei ua molimauina ai e toafā tamaitai ua talosaga mo avanoa o Faamasino o lea Faamasinoga, ma o loo faagasolo i le faaiuga o le vaiaso lenei faatalatalanoaga o nei avanoa.
O le toatolu o i latou ua talosaga o tamaitai. O loo faaopoopo ai pea foi le numera o tamaitai ua ausia ia tofiga maualuluga ma o le toafā ua faaofi o latou suafa i nei tofiga e aofia ai se tasi ua tele tausaga o tautua i le Ofisa Faasalalau o le 2AP, e lē gata i lea o le Matagaluega o Mataupu tau Tina ma Tamaitai i le vaega o Lotoifale poo Atina‘e o Nuu. O ia foi sa faaipoipo atu i se tasi o sui o le Palemene le Afioga Su‘a Atonio, le Susuga lea ia Tuivasa Faameia Su‘a.
E lē gata i lea o se tasi o tamaitai ua talosaga mo lenei avanoa ua tele tausaga o galue i le atina‘e o tamaitai i afioaga e pei ona tofia ai o ia e avea ma Peresitene o le Komiti Tumamā a Samoa, le Susuga Tafafuna‘i Tavai Manuuli Anapu.
O lona alii foi sa galue o se faamasino i tausaga ua mavae ae ua mālōlō litaea i le taimi nei. E toatasi le tamaitai ua talosaga i lenei tofiga ae ua maualuga ana foi taumafaiga ma galuega ina ia fesoasoani ai mo tagata Samoa i Niu Sila.
O le Afioga Magele Tagaloa Nua Elizebeth Su‘a, ua tele tausaga o avea ma Peresitene o le Fono a Faufautua a tagata Samoa i Niu Sila.
O ia foi o loo faauluulu i ai le Fono Faufautua a le aai o Kalaisetete, lea foi na te faafoea ai lana auaunaga faatausi soifua ma se isi auaunaga o se leitio mo tagata Samoa i lea itu o Niu Sila.
O lona soifua auauna ua aofia ai foi ma le tautuaina o le Faamasinoga i Niu Sila o se faufautua ma se faaliliuupu i nisi o taimi mo tagata Samoa ua aafia i solitulafono aemaise i latou ua sauāina, ua fesoasoani malosi i ai lenei tamaitai.
O le taimi lenei e ese mai i le Afioga i le Sui Peresitene, o nisi o tamaitai o Samoa ua tele tausaga o auauna i le Faamasinoga o Fanua ma Suafa e aofia ai le Afioga Faleseu Leute Purcell, o se tamaitai ua tele foi tausaga o galue o se tusitala ma o ia sa Faatonu o le Nusipepa a le Malo, le Savali i le tele o tausaga a o lei agai i le Faamasinoga o Fanua ma Suafa.
O le isi o uluai tamaitai na tulai mai i lenei tofi Faamasino o le Afioga a Galumalemana Netina Schmidt, ua tele tausaga o galue o se faiaoga ma avea ai o ia ma Faamasino Mulimuli ane. E toatele foi i latou na tautua ma o loo tautua pea o ni Malu o le Malo ua talosaga i nei avanoa ma ua iai foi nisi na tautua i lea auaunaga ua seei nei i le Vasega o Faamasino a le Faamasinoga o Fanua ma Suafa.
O i latou nei ua vaaia i aso uma le fofogaina ai o le mau mataupu tau i fanua ma mataupu tau i suafa o loo feeseeseai ai aiga, aulotu faapea faiganuu. O le tele o le suiga ua vaaia i lenei vaitau o le tulaga lea o le faamalosia atu i lenei faamasinoga o aiā tatau faaletagata ua oia ona o finauga a nisi o tu ia ma aga faa-Samoa.
O le galuega la lea ua tele foi ina nafa ma i latou e avea ma Faatonu poo Faamasino o le Faamasinoga o Fanua ma Suafa. E tatau ona mae‘a lenei masina ua silafia i latou e tulai mai i nei tofiga ua saili e lea foi Faamasinoga i le atunuu.
