E toatolu nai tamaiti na matapogia i le aso o le Sisigafu’a a le atunuu. O le fuainumera lea na aumai e le vaega a le Koluse Mumu, lea na gafa ma le galuega laveai i le aso o le Sisigafu’a.
Faaalia e le sui o le Kolusu Mumu na feagai i lea aso, ae e lei fia faailoaina lona suafa ona o puipuiga tau tulafono, o le toatolu na matapogia o tamaiti aoga. O le toatasi o le tamaititi aoga o le aoga mai Niu Sila lea na savavali o le Newton School, o le isi toalua o se teineititi aoga mai Savaii, ma le isi o le tamaititi aoga lava i Upolu.
O se fuainumera ua faailoa e le sui o le Koluse Mumu, ua faaitiitia pe a fua i tausaga ua mavae. E masalo ona ua nofouta uma mātua aemaise o faalapotopotoga ma matagaluega e tausasami lelei pe afai e camp.
Peitai e leai se popolega o le Koluse Mumu i tulaga faapea ona ua masani ai. Peitai na faaalia e le sui o le Koluse Mumu e pau lona faanoanoaga e tiga lava ona silasila ane malu o le malo o latou o le Koluse Mumu ae poloka lava le latou taavale, ae saunoa ane e savavali uma i tai i Mulinuu e pei o tagata uma.
Saunoa le sui o le Koluse Mumu na finau pea i ai ma faailoa i ai meafaigaluega e moomia mo galuega laveai lea na faatoa faataga ai latou ona agai i le latou taavale i le malae i Tiafau.
Peitai o le fautuaga a le Koluse Mumu e ao ona malamalama lelei malu o le malo, auā afai ae matapogia foi se isi o latou a’o i luga o le latou tiute, o le Koluse Mumu e muamua ona oo i ai e fai ai le fesoasoani muamua e laveai ai lona soifua.
Ua toe malolosi uma nai fanau ia na matapogia, ma o loo masalomia o loo aafia i le flu, ae o le mananao lava o nai fanau e fia savavali ia latou aoga.
O le Koluse Mumu lea na mulimuli i ai le savali o le ausavavali i le Fu’a. Ae o le faamanatuga foi lea o le Fu’a ua faaalia ai le lē fiafia o nisi o loo matauina taualumaga o le Fu’a.
E pei ona faaalia i tusitusiga i luga o le facebook, e faapea o le tatope lau ma faatopetope o le ausavavali, ae e tele foi tapenaga na faafeagai ma i latou.
E pei la o le toatele o aoga mai tuā ma faalapotopotoga, ae na agiga i le aso o le Tutoatasi le saunoaga a se tasi o Komiti, e faatopetope ai le savavali ma faaalia mai e lē o toe taliaina ni fa’alo e pei ona masani ai ae tau lava o le talotalo i le auvalaaulia.
O lea faiga ua faaalia ai le lē ano ma le lē faatāuaina o tapenaga ua leva ona tapena ai le fanau aoga, aemaise o tapenaga o lavalava ma laei, faaopoopo atu i ai ma le taimi na taunuu ane ai i le malae i Tiafau. Peitai e tasi lava le vaega o loo taunapa i ai le komiti, e lē mananao le komiti e maua e le au savavali le aasa o le la, ma e tatau lava ona mae’a ane le savali e lei aasa tele le la mo tagata o le atunuu o loo savavali pea.
E mae’a ane le polokalame o le Fu’a e lei taina le iva i le taeao, o le Fu’a lenei ua tau leai ni ausavavli e lei tumutumu foi e pei ona matauina i isi tausaga ua mavae. Ae o se tasi vaega na aupito sili ona matauina, o le vaevaega e le komiti o le Tutoatasi o le faasologa o le ausavavali, na vaevae lelei e muamua le fanau aoga i le vaega laiti poo le Primary, sosoo atu ai Kolisi, Faalapotopotoga ae mulimuli i Matagaluega a le Malo.
