O lana tautua lelei i le matagaluega o leoleo i le 20 tausaga atoa ma lona faamaoni e pei ona iai se tusi mai le Komesina o leoleo sa tuuina atu i le faamasinoga, o se isi lea o vaega tāua sa silasila i ai le faamasinoga i le faia o lana faaiuga i le alii taitai leoleo o Luatimu Samau.
E lua moliaga sa molia ai Luatimu na faamaonia ina ua mae‘a ona valaau molimau. O le moliaga o le faaoolima, ma le moliaga o le faaoo manu‘a.
O Luatimu sa ia taitaia le suesuega a leoleo i le maliu ai o se teineititi o le tama teine a le tina o Faasalafa ma lona toalua o Sione lea o loo falepuipui soloatoa i le fasiotia o le teineititi lea e lei maua poo fea o tanumia ai lona tino.
O le suesuega lea na tuuaia ai Luatimu i le faaoolima i le tina o Faasalafa ma mafua ai moliaga.
O le alofilima o lea tina na manu’a ma e tolu filo na su’Ii ai ile falemai i Lalomanu Aleipata.
O le moliaga o le faaoolima ua faamaonia, ae ua faapafala se faasalaga (convicted and discharge).
O le moliaga o le faaoo manu‘a ua faamaonia ma ua faasalaina ai Luatimu e le faamasinoga i le $800 tala, ma le tuutuuga ia mae‘a galuega o le Aso Faraile na tea nei 27 o Ianuari 2012, ua uma ona totogi. Afai e lē ausia lea tulaga o le a tuuina atu o ia i le falepuipui mo le umi e 6 masina.
E manino mai i le faaiuga a le faamasinoga, na mafua ona faia e le alii leoleo asiasi poo se Inspector le faaoolima i le tina o Faasalafa Sione, ona ua fiu e fesiligia le tina ia latou suesuega sa faia, ae lē tautala sa‘o.
Faaalia e le alii faamasino o Vaepule Vaemoa Vaai, e leai se tagata soifua e lē malamalama ma silafia ni tulaga faapea e tulai mai ma e leai se isi e atoatoa.
Peitai o loo manino le tulafono e lē mafai e se leoleo o le Malo ona ia sopoloa ai i le faatinoga o ona tiute i le soli ai o le tulafono.
O le itu ogaoga i le silasila a le faamasinoga ona o le mea na tupu sa faia ae o loo laeiina e lē ua molia ofu togiga o le galuega faaleoleo.
O le tina o Faasalafa sa molimau mo leoleo faasaga i le susuga Luatimu, peitai sa ia teena le faaoolima o lē ua molia ia te ia. I le faaiuga a le faamasinoga e ui ina sa femoumouai le molimau a le tina, ae sa ia tautino sa faatoese atu Luatimu ia te ia ona o le mea na tupu.
O le faasalaga ua faia e le Faamasinoga, ua ave ai ma le talosaga i lē ua molia ia faaaogāina lona taimi e aoao ai leoleo laiti faato‘ā galulue i le lē fetaui o lana gaioiga na fai.
O se fesoasoani foi lea i leoleo laiti (junior officers) ia alofia le aafia ini solitulafono faapea ile faatinoga oo latou tiute.
E atagia mai ile faaiuga a le faamasinoga e mafai ona toe faaauauina pea le auaunaga a le susuga Luatimu Samau i le matagaluega o leoleo ma falepuipui.
O le aafia o le tina o Faasalafa i ni manu‘aga na mafua ai foi ona molia ni tamaitai leoleo se toalua sa aofia i le suesuega sa taitai ai le susuga Luatimu.
O Efo Moalele na faamaonia lona moliaga o le faaoolima ae na faia le faaiuga e soloia le moliaga e aunoa ma se faasalaga, ma ua toe faaauau ona tiute faaleoleo.
O le tamaitai leoleo o Ferila Papalii na faamaonia ona moliaga o le faaoolima ma le faaoo manu‘a, ma e tasi le tausaga ua faasalaina ai i le falepuipui.
